ڈھاکہ: پاکستان بمقابلہ بنگلادیش کے درمیان دوسرے ٹی ٹوئنٹی میچ میں بنگادیش نے پاکستان کو جیت کے لیے 109 رنز کا ہدف دے دیا ہے۔

 ڈھاکہ کے شیر بنگلا کرکٹ اسٹیڈٰیم میں آج پاکستان اور بنگلادیش کے درمیان ٹی ٹوئنٹی سیریز کا  دوسرا میچ کھیلا جارہا ہے جس میں بنگلادیش نے ٹاس جیت کر پہلے بیٹنگ کرنے کا فیصلہ کیا ہے۔

بنگلادیش نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 108 رنز اسکور کیے اور پاکستان کو جیت کے لیے 109 رنز کا ہدف دیا ہے۔

بنگلادیش کی جانب سے نجم الحسین شنٹو 34 گیندوں پر 40 رنز بناکر نمایاں رہے جبکہ عاطف حسین نے 21 گیندوں پر 20 رنز اسکور کیے۔

پاکستان کی جانب سے شاہین شاہ آفریدی اور شاداب خان نے 2،2 کھلاڑیوں کا پویلین کی راہ دکھائی جبکہ محمد وسیم، حارث روف اور محمد نواز نے 1،1 کھلاڑی کو آوٹ کیا۔

واضح رہے کہ دوسرے ٹی ٹوئنٹی کے لیے قومی ٹیم میں ایک تبدیلی کی گئی ہے اور حسن علی کی جگہ شاہین شاہ آفریدی کو شامل کیا گیا ہے۔

علاوہ ازیں قومی ٹیم میں بابراعظم، محمد رضوان، فخر زماں، حیدر علی، شعیب ملک، خوشدل شاہ، شاداب خان، محمد نواز، شاہین آفریدی، حارث روف اور محمد وسیم شامل ہیں۔

خیال رہے کہ سیریز کا تیسرا ٹی ٹوئنٹی انٹرنیشنل میچ 22 نومبر کو اسی مقام پر کھیلا جائے گا جبکہ دورہ بنگلادیش کے دوران پاکستان ٹیم بنگلا دیش سے 2 ٹیسٹ میچز بھی کھیلے گی۔

ٹیسٹ سیریز کا پہلا میچ 26 نومبر سے 30 نومبر کے درمیان کھیلا جائے گا جبکہ دوسرا میچ 4 دسمبر سے شروع ہوگا جو 8 دسمبر تک جاری رہے گا۔