کراچی: کورونا کے خطرات کے پیش نظر پی ایس ایل 7 میں کھلاڑیوں اور آفیشلز کی حفاظت کے لیے پورا ہوٹل بک کرانے کا فیصلہ کیا گیا ہے۔

نجی خبر رساں ادارے کی رپورٹ کے مطابق پی سی بی نے کورونا خطرات کے پیش نظر جنوری میں ہونے والے پی ایس ایل 7 میں کھلاڑیوں اور آفیشلز کی حفاظت کو مد نظر رکھتے ہوئے کراچی اور لاہور میں پورے ہوٹلز بک کرانے کا فیصلہ کیا ہے۔

رپورٹ کے مطابق پی سی بی چیف آپریٹنگ آفیسر سلمان ںصیر کا کہنا ہے کہ ویسٹ انڈیز کی ٹیم اپنے ساتھ کورونا وائرس لائی، گزشتہ 24 گھنٹے مشکل رہے، ابتدا میں 3 کھلاڑیوں کے کورونا ٹیسٹ مثبت آئے جبکہ بعد ازاں مزید 3 کھلاڑیوں سمیت 2 آفیشلز میں کورونا ٹیسٹ مثبت آنا تشویش کا باعث بنا جس کی وجہ سے پاک ویسٹ انڈیز کی ون ڈے سیریز ملتوی کردی گئی۔

انہوں نے مزید کہا کہ امید ہے کہ آسٹریلیا کی کرکٹ ٹیم شیڈول کے مطابق پاکستان کا دورہ کرے گی، آسٹریلوی کرکٹ بورڈ کے سیکیورٹی وفد نے انتظامات پر اعتماد کا اظہار کیا ہے۔

واضح رہے کہ پی ایس ایل 7 کا آغاز رواں ماہ 27 دسمبر سے ہوگا جس کے 15 میچز کراچی اور 19 میچز لاہور میں منعقد کیے جائیں گے۔

دوسری جانب 12 دسمبر کو ہونے والی پی ایس ایل کی ڈرافٹنگ میں نظرانداز ہونے والے کرکٹرز کو ایک اورسنہری موقع مل گیا ہے جبکہ ہر فرنچائز اب مزید 2، 2 کھلاڑیوں کو اسکواڈ میں شامل کرسکے گی۔