ویسٹ انڈین کرکٹ ٹیم کے ہیڈ کوچ فل سمنز کا کہنا ہے کہ ہم نے شاہین شاہ آفریدی کے خلاف حکمت عملی تیار کرلی ہے۔

ویڈیو کانفرنس میں ان کا کہنا تھا کہ شاہین  شاہ آفریدی بہترین بولر ہیں اور ہماری ٹیم میں نوجوان کھلاڑی ہیں ،ہم دیکھنا چاہتے ہیں  کہ وہ شاہین کے خلاف کیسا کھیلتے ہیں۔

فل سمنز نے کہا کہ  پاکستان کے خلاف پاکستان میں کھیلنا ایک چیلنج ہے۔ ہمارے کھلاڑیوں کا اس پریشرمیں امتحان ہوگا جبکہ پاکستانی  کھلاڑیوں کوان وکٹوں پر کھیلنے کی عادت ہے۔

 انہوں نے مزید کہا کہ  پاکستانی اوپنرز مسلسل اچھا پرفارم کررہے ہیں، کوشش کریں گے اوپننگ جوڑی جلد توڑیں۔پاکستان کے اوپنرز جلد آؤٹ ہوئے تو پریشر ڈال سکتے ہیں، انہیں جلد آؤٹ کرنے کے لیے پلان اے ، بی  اور سی تیار ہیں۔

ویسٹ انڈین کوچ کا کہنا تھا کہ ہمارا مقصد صرف سیریز جیتنا ہے۔

پاکستان میں کھیلنے سے متعلق انہوں نے کہا کہ  پاکستان آکر ہمیشہ انجوائے کیا ہے۔ یہاں کبھی بھی کسی قسم کا کوئی مسئلہ نہیں ہوا۔ جب بطور کھلاڑی یہاں آیا تھا تب حالات مختلف تھے اب کورونا کی وجہ سے کہیں جا نہیں سکتے۔

واضح رہے کہ دونوں ٹیموں کے مابین تین ٹی ٹوئنٹی میچز کی سیریز کا میچ 13 دسمبر، دوسرا میچ 14 دسمبر اور تیسرا میچ 16 دسمبر کو کھیلا جائے گا۔

تین ون ڈے میچز پر مشتمل سیریز کے میچز بالترتیب 18، 20 اور 22 دسمبر کو کھیلے جائیں گے۔