آسٹریلوی وائٹ بال ٹیم کے  کپتان  ایرون فنچ نے ٹی ٹوئنٹی کرکٹ میں اہم سنگ میل عبور کرلیا۔

انہوں نے یہ اعزاز گزشتہ روز بگ بیش لیگ میں میلبورن رینیگیڈز کی جانب سے پرتھ اسکارچرز کے خلاف 68 رنز کی اننگز کھیل کر اپنے نام کیا۔

ایرون فنچ  ٹی ٹوئنٹی کرکٹ میں 10 ہزار رنز بنانے والے چھٹے بلے باز بن گئے ہیں۔

ٹی ٹوئنٹی کرکٹ میں سب سے زیادہ (14321) رنز بنانے کا اعزاز ویسٹ انڈیز کے کرس گیل کے پاس ہے ۔ صرف یہی نہیں سب سے زیادہ سنچریز (22) ، نصف سنچریز (87) ، چھکوں (1045)اور چوکوں (1108) کا ریکارڈ بھی انہیں کے قبضے میں ہے جو مستقبل قریب میں ٹوٹنا تقریباً ناممکن ہی نظر آتا ہے۔

https://twitter.com/ESPNcricinfo/status/1473945222249730048

سب سےزیادہ رنز بنانے والوں میں دوسرے نمبر پر ویسٹ انڈیز کے ہی کیرون پولارڈ موجود ہیں  جو ایک سنچری اور 56 نصف سنچریز کی بدولت اب تک 11326 رنز بناچکے ہیں۔

پاکستانی مڈل آرڈر بلے باز شعیب ملک 68 نصف سنچریز کی بدولت 11274 رنز بناکر اس فہرست میں تیسرے نمبر پر موجود ہیں۔

آسٹریلیا کے ڈیوڈ وارنر 8 سنچریز  اور 85 نصف سنچریز کی بدولت 10308  جبکہ بھارت کے ویرات کوہلی 5 سنچریز اور 75 نصف سنچریز کی بدولت 10204 رنز بناکر بالترتیب چوتھی اور پانچویں پوزیشن پر موجود ہیں۔

ایرون فنچ   اس فہرست میں شامل ہونے والے چھٹے کھلاڑی ہیں  جنہوں نے 8 سنچریز اور 65 نصف سنچریز کی مدد سے  10048 رنز بنالیے ہیں۔