کراچی: ویسٹ انڈیز ٹیم کے 21 میں سے 20 ممبران آج علی الصبح کراچی سے دبئی روانہ ہوگئے ہیں۔

پاکستان اور ویسٹ انڈیز کے درمیان تین ٹی ٹوئنٹی میچز پر مشتمل سیریز کھیلی گئی جس میں پاکستان نے ویسٹ انڈیز کو وائٹ واش کردیا جبکہ دونوں ٹیموں کے درمیان ہونے والی ون ڈے سیریز ملتوی کردی گئی ہے جو اب اگلے سال جون میں کھیلی جائے گی۔

ٹی ٹوئنٹی سیریز سے فارغ ہونے کے بعد ویسٹ انڈیز کی ٹیم کے 21 میں سے 20 ممبران آج علی الصبح کراچی سے دبئی روانہ ہوگئے ہیں جبکہ ویسٹ انڈیز ٹیم کے کوچ فل سمنز آج رات روانہ ہوں گے۔

واضح رہے کہ پاکستان اور ویسٹ انڈیز کے درمیان تینوں ٹی ٹوئنٹی میچز کراچی کے نیشنل اسٹیڈٰیم میں کھیلے گئے جس کے پہلے میچ میں پاکستان نے ویسٹ انڈیز کو 63 رنز اور دوسرے میچ میں 9 رنز سے شکست دی تھی۔

تیسرا ٹی ٹوئنٹی

گزشتہ روز نیشنل اسٹیڈیم میں کھیلا گیا تیسرا ٹی ٹوئنٹی میچ غیر یقینی صورت حال کا شکار رہا کیونکہ ویسٹ انڈیز کے 3 کھلاڑیوں سمیت 2 آفیشلز میں کورونا وائرس کی تصدیق ہوئی تھی جس کے بعد تیسرا ٹی ٹوئنٹی میچ خطرے میں پڑگیا تھا۔

بعد ازاں حکام  نے ٹیموں کے گراؤنڈ میں اترنے کی نوید سنائی جس کے بعد میچ کا آغاز مقامی وقت کے مطابق ہوا اور اس میچ میں ویسٹ انڈیز نے ٹاس جیت کر پہلے بیٹنگ کرنے کا فیصلہ کرتے ہوئے پاکستان کو جیت کے لیے 208 رنز کا ایک بڑا ٹارگٹ سیٹ کرکے دیا۔

پاکستان کی جانب سے بھی اچھی بیٹنگ دیکھنے کو ملی، کپتان بابر اعظم اور محمد رضوان نے ایک اور ریکارڈ ساز اننگ کھیل کر پاکستان کی فتح کی راہ ہموار کی جبکہ پاکستان نے یہ میچ 3 وکٹوں کے نقصان پر ایک اوور پہلے ہی ختم کردیا۔

اس میچ میں بہترین کھلاڑی کا اعزاز محمد رضوان کے نام رہا جنہوں نے 45 گیندوں پر 87 رنز اسکور کیے اور ساتھ ہی رواں سال انہوں نے 2 ہزار بھی مکمل کرلیے جبکہ محمد رضوان کو 3 میچز میں 203 رنز بنانے پر مین آف دی سیریز کا ایوارڈ بھی دیا گیا۔