پاکستانی وکٹ کیپر بلے باز محمد رضوان کا سسیکس کاؤنٹی سے معاہدہ ہوگیا ہے۔

سسیکس کاؤنٹی کی جانب سے جاری کردہ بیان میں کہا گیا ہے کہ محمد  رضوان اپریل میں آسٹریلیا کے دورہ پاکستان کے بعد سسیکس ٹیم جوائن کریں  گے۔

محمد رضوان  جولائی کے وسط میں وائٹلٹی بلاسٹ کے اختتام تک چیمپئن شپ اورٹی ٹوئنٹی کرکٹ میں سسیکس کی نمائندگی کریں گے۔

پشاور سے تعلق رکھنے والے 29 سالہ  رضوان کا  شمار دنیا کے سب سے کامیاب  کیپرز میں سے ہوتا ہےاور ان کا تمام فارمیٹس میں بلے بازی کا ریکارڈ بھی  بہت شاندار ہے۔

https://twitter.com/SussexCCC/status/1471465217305591817

فرسٹ کلاس کرکٹ میں ان کی بیٹنگ اوسط 43 سے زیادہ ہے، جس میں 19 ٹیسٹ میچز میں 42 سے زائد کی اوسط سے تقریباً  ایک ہزار رنز بھی شامل ہیں۔

انہوں نے 2020 میں انگلش کنڈیشنز میں انگلینڈ کےخلاف  تین ٹیسٹ میچز کی سیریز  میں 40 سے زیادہ کی اوسط سے رنز بنائے تھے اور پاکستان کی جانب سے سیریز کے کامیاب ترین بلے باز قرار پائے تھے۔

اس کے علاوہ 54 ٹی ٹوئنٹی میچز  میں محمد رضوان کی اوسط 126.6 کے اسٹرائیک ریٹ  کے ساتھ 50.06 ہے۔

رواں برس وہ ایک کیلنڈر ایئر  میں ٹی ٹوئنٹی انٹرنیشنل میچز میں ایک ہزار سے زیادہ رنز بنانے والے پہلے بلے باز بن گئے ہیں جبکہ ایک کیلنڈر ایئر میں سب سے زیادہ ٹی ٹوئنٹی  رنز بنانے  کا کرس گیل کا چھ سال پرانا ریکارڈ  بھی توڑ دیا ہے۔