ملتان سلطانز کے کپتان محمد رضوان نے اپنی ٹیم کے کھلاڑیوں کو چیمپئن بننے کا گرُ بتادیا۔

ہوٹل روم میں دفاعی چیمپئن ملتان سلطانز  کی ٹیم میٹنگ کے دوران محمد رضوان نے کہا کہ الحمد اللہ ساری چیزیں اچھی جارہی ہیں۔اگر بلے بازوں کو 200 رنز کا ہدف بھی ملے تو اسے پورا کرنا ہے اور الحمد اللہ ہم نے چیمپئن ٹیم کی طرح یہ کرکے دکھایا ہے۔

انہوں نے مزید کہا کہ بالرز نے مخالف ٹیم کو 125 رنز پر آؤٹ کیا جس سے پتہ چلتا ہے کہ جو چیمپئن ٹیم کی خصوصیات ہیں وہ ہم میں آرہی ہیں۔

کپتان کا کہنا تھا کہ ہم مختلف خطوں اور ممالک سے تعلق رکھتے ہیں، ہمارا مذہب بھی مختلف ہے لیکن ہم سب ایک ہوکر ملتان سلطانز کے لیے کھیلتے ہیں ، سب کا ایک ہی مقصد ہے ملتان سلطانز کو چیمپئن بنوانا۔

انہوں نے مزید کہا کہ ہم چیمپئن تب بنیں گے جب گراؤنڈ میں ہر ایک کھلاڑی کوشش کرے گا۔

Captain fantastic @iMRizwanPak gave a heartfelt speech on what it means to play for the #Sultans 💚#SultanAaGayya #HBLPSL7 pic.twitter.com/iyfPmj65Mb

— Multan Sultans (@MultanSultans) February 1, 2022

محمد رضوان کا کہنا تھا کہ کوشش نظر آئے گی فیلڈنگ میں ، کوشش نظر آئے گی بالر کے بال کرنے میں اور کوشش نظر آئے گی بلے باز کے بلا خوف بیٹنگ کرنے میں، یہ کچھ چیزیں ایسی ہیں جن پہ کوئی سمجھوتہ نہیں کرنا۔

خیال رہے کہ دفاعی چیمپئن ملتان سلطانز پی ایس ایل کے ساتویں ایڈیشن میں تین میچز کھیل کر ابھی تک ناقابل شکست ہے۔

ملتان سلطانز نے کراچی کنگز، لاہور قلندرز اور کوئٹہ گلیڈی ایٹرز کو شکست دی ہے جبکہ اس کا اگلا مقابلہ آج اسلام آباد یونائیٹڈ سے ہوگا۔