انڈر 19 ورلڈ کپ میں قومی ٹیم کے کپتان قاسم اکرم نے نئی تاریخ رقم کردی ہے۔

نارتھ ساؤنڈ میں کھیلے گئے میچ میں پاکستان نے پہلی بیٹنگ کرتے ہوئے 3 وکٹوں پر 365 رنز اسکور کیے تھے۔

اس میچ میں اچھی بیٹنگ کا مظاہرہ کرتے ہوئے حسیب اللہ خان نے 136 رنز اور کپتان قاسم اکرم نے 135رنز کی ناقابل شکست اننگز کھیلی جبکہ دونوں کھلاڑیوں کے درمیان دوسری وکٹ پر 229 رنز کی شراکت داری قائم ہوئی۔

قاسم اکرم 63 گیندوں پر سنچری مکمل کرکے پاکستان کی جانب سے انڈر 19 ورلڈ کپ میں تیز ترین سنچری بنانے کا اعزاز اپنے نام کیا ہے۔

پاکستان نے مقررہ 50 اوورز میں 3 وکٹوں کے نقصان پر 365 رنز اسکور کیے جس کے تعاقب میں سری لنکن ٹیم کی بیٹنگ لائن ریت کی دیوار ثابت ہوئی اور پوری ٹیم صرف 127 رنز پر ہی ڈھیر ہوگئی۔

بیٹنگ کے بعد بولنگ میں بھی کپتان قاسم اکرم نے اچھی کارکردگی کا مظاہرہ دکھایا اور 37 دے کر انہوں نے 5 کھلاڑیوں کو آؤٹ کیا۔

قومی ٹیم کے کپتان قاسم اکرم انڈر 19 کرکٹ ورلڈ کپ کے ایک ہی میچ میں 5 وکٹیں اور سنچری اسکور کرنے والے دنیا کے پہلے کھلاڑی بن گئے ہیں۔

Advertisement

First player to make a hundred and claim a five-wicket haul in an #U19CWC match 🔥#SLvPAK pic.twitter.com/GP5KovBvVe

— ICC Cricket World Cup (@cricketworldcup) February 3, 2022

واضح رہے کہ ویسٹ انڈیز میں کھیلے جارہے انڈر 19 کرکٹ ورلڈ کپ کے پلے آف میچ میں پاکستان نے سری لنکا کو 238 رنز سے  شکست دے کر پانچویں پوزیشن حاصل کرلی ہے۔