پاکستان کرکٹ بورڈ (پی سی بی) کا کہنا ہے کہ آسٹریلوی کرکٹ ٹیم کو کوئی خطرہ نہیں ہے۔

ذرائع کے مطابق پی سی بی کا کہنا ہے کہ  کرکٹ آسٹریلیا سوشل میڈیا کی ایک پوسٹ سے مکمل باخبر ہے۔ فریقین  کی سرکاری سیکیورٹی ایجنسیز نے اس پوسٹ کی نوعیت اور کنٹینٹ کی تحقیقات کی ہیں۔

پی سی بی ذرائع کا کہنا ہے کہ اس قسم کی سوشل میڈیا سرگرمی کے لیے جامع سیکورٹی پلانز ترتیب دیے گئے ہیں، ایسی دھمکیوں سے کوئی خطرہ نہیں  ہے ۔

پی سی بی ذرائع کا مزید کہنا ہے کہ اس حوالے سے مزید کوئی تبصرہ نہیں کیا جائے گا۔

واضح رہے کہ پاکستان میں انٹرنیشنل کرکٹ کی بحالی روکنے کے لیے بھارتی حکومت اوچھے ہتھکنڈوں اور سازشوں سے بازنہ آئی،  آسٹریلوی کرکٹ ٹیم کو بھی پاکستان آنے پر دھمکیاں ملنے لگیں۔

24  سال بعد پاکستان کا دورہ کرنے والی آسٹریلوی کرکٹ ٹیم کو دھمکی آمیز پیغامات بھیجے گئے ہیں تاکہ وہ بھی نیوزی لینڈ کی ٹیم کی طرح دورہ ادھورا چھوڑ کر واپس چلی جائے ۔

26 فروری 2022 کوپاکستان کا دورہ کرنے والی آسٹریلوی کرکٹ ٹیم کے ایک رکن کے خاندان کو انسٹا گرام پر دھمکی آمیز پیغامات  بھیجے گئے جس میں انہیں پاکستان جانے پر خطرناک نتائج بھگتنے کی دھمکی ملی  تھی۔

بظاہردھمکی آمیز پیغامات بھجوانے کے لیے انسٹا گرام پر  فیک اکاؤنٹ  کااستعمال کیا گیا  لیکن تفصیلی تحقیقات کے دوران اس دھمکی آمیز پیغامات کے پیچھے بھارتی گجرات میں مقیم مرائدل تیواڑی کے ملوث ہونے کے ناقابل تردید ثبوت سامنے آئے ہیں ۔

مرائدل تیواڑی بھارتی گجرات میں آئی ایم سی لمٹیڈ میں بطور انوائرمینٹل، ہیلتھ اور سیفٹی آفیسر کے طور پر کام کرتا ہے۔