آج کا دن کرکٹ کی تاریخ میں اہمیت کا حامل ہے کیونکہ 145 سال قبل آج ہی کے دن پہلا ٹیسٹ میچ کھیلا گیا تھا۔

کرکٹ کی تاریخ میں آج یعنی 15 مارچ کا دن بے حد خاص ہے کیونکہ 145 سال قبل 1877 میں آج ہی کے دن پہلا ٹیسٹ میچ کھیلا گیا تھا۔

پہلا ٹیسٹ میچ آسٹریلیا اور انگلینڈ کی کرکٹ ٹیموں کے درمیان کھیلا گیا تھا جبکہ یہ تاریخی مقابلہ دونوں ٹیموں کے درمیان میلبورن کرکٹ اسٹیڈٰیم میں منعقد کیا گیا تھا۔

اس میچ میں دونوں ٹیموں نے اپنے نام کئی ریکارڈ کیے جو تاریخ کا حصہ بن گئے جس میں سے ایک آسٹریلوی بلے باز چارلس بینرمین کی کمال کی بلے بازی تھی، جنہوں نے ٹیسٹ تاریخ کی پہلی سنچری اپنے نام کی تھی۔

میلبورن میں کھیلے جانے والے اس میچ میں آسٹریلیا نے ٹاس جیت کر پہلے بلے بازی کرنے کا فیصلہ کیا، آسٹریلوی بلے بازوں کی اننگ کی شروعات اچھی نہیں رہی اور ان کی پہلی وکٹ 2 رنز پر ہی گرگئی تھی۔

بعد ازاں آسٹریلیا کی دوسری وکٹ 12 رنز پر گری اور پھر تیسری وکٹ بھی گرگئی، ایسی صورتحال جب ایک کے بعد آسٹریلیا کی وکٹ گرتے چلے جارہی تھی تو چارلس بینرمین نے ٹیم کو سہارا دیا اور خود 165 رنز بناکر ریٹائر ہرٹ آؤٹ ہوئے۔

اس طرح آسٹریلیا نے اپنی پہلی اننگ میں مجموعی طور پر 245 رنز بنائے جس کے جواب میں انگلینڈ کی پوری ٹیم 196 رنز پر ڈھیر ہوگئی۔

انگلش ٹیم کی جانب سے ہیری جپ نے سب سے زیادہ 63 رنز اسکور کیے تھے جبکہ ہیرل چارل ووڈ نے 36 اور ایلن ہل نے 35 رنز اسکور کیے تھے۔

دوسری اننگ میں آسٹریلوی بلے باز بھی لڑکھڑا گئے اور پوری ٹیم صرف 104 رنز ہی اسکور کرسکی، اس اننگ میں بینرمین بھی صرف 4 رنز بناکر پویلین لوٹے تھے جبکہ انگلش بولر نے 5 کھلاڑیوں کو آؤٹ کیا تھا۔

اس طرح انگلش ٹیم کو جیتے کے لیے 153 رنز درکار تھے لیکن انگلش بلے باز اس مرتبہ بھی کام نہ آسکے اور صرف 108 رنز ہی بناسکے جس کے بعد آسٹریلیا نے یہ میچ 45 رنز سے اپنے نام کیا۔

کرکٹ کی تاریخ

کرکٹ کی شروعات 16 صدی میں ہوئی جس کا بانی انگلینڈ کو کہا جاتا ہے لیکن کچھ کرکٹ پنڈتوں کے مطابق اس کھیل کی شروعات پہلے امریکہ میں ہوئی جس کے بعد انگلینڈ میں توسیع ہوئی۔

کرکٹ پنڈتوں کے مطابق انگلینڈ میں پہلے کاؤنٹی کرکٹ وجود میں آئی جبکہ 1787 میں مشہور میلبورن کرکٹ کلب وجود میں آیا۔

ٹیسٹ کرکٹ شروع ہونے سے قبل آسٹریلیا اور جنوبی افریقہ کی ٹیمیں انگلینڈ کے دورے کرچکی ہیں جس میں انہوں نے کاؤنٹی کرکٹ کھیلی تھی۔

ان ٹیموں کے درمیان کاؤنٹی کرکٹ کا سلسلہ کئی دہائیوں تک جاری رہا ہے لیکن ٹیسٹ کرکٹ کا وجود 15 مارچ 1877 کو ہوا۔