سابق چیئرمین پی سی بی ذکا اشرف نے انکشاف کیا ہے کہ غیر ملکی دورے پر کھلاڑیوں کے ساتھ بیویوں کو ان پر نظر رکھنے کے لیے بھجوایا جاتا ہے۔

پاکستان اور بھارت کے درمیان ہمیشہ اختلافات رہے ہیں جبکہ یہ اختلافات کرکٹ سمیت تمام پہلوؤں میں موجود ہیں۔ دونوں ممالک نے 2012 تا 13 کے بعد سے کوئی دو طرفہ سیریز نہیں کھیلی ہے۔

پاکستان کرکٹ بورڈ (پی سی بی) کی کوششوں کے باوجود بھی بھارتی حکومت کوئی دلچسپی نہیں رکھتی ہے جبکہ آخری مرتبہ پاکستان نے بھارت کا سفر اس وقت کے کرکٹ بورڈ کے چیئرمین ذکا اشرف کے دور میں کیا تھا۔

کرکٹ ویب سائٹ کو انٹرویو دیتے ہوئے سابق چیئرمین پی سی بی ذکا اشرف کا کہنا تھا کہ اس وقت پی سی بی نے کھلاڑیوں کے ساتھ بیویوں کو ان کے دورہ بھارت پر بھیجنے کا فیصلہ کیا تھا تاکہ کسی بھی حادثے یا تنازعات سے بچا جاسکے۔

ان کا کہنا تھا کہ میرے دور میں جب ہماری ٹیم انڈیا کے دورے پر گئی تھی تو میں نے مشورہ دیا تھا کہ تمام کھلاڑیوں کی بیویاں ان کے ساتھ ہوں گی۔

یہ فیصلہ اس لیے کیا گیا تاکہ کوئی تنازعہ پیدا نہ ہو کیونکہ بھارتی میڈیا ہمیشہ اس کی تلاش میں رہتا ہے جبکہ بیویوں کو ساتھ میں رکھنے کا مطلب ان کھلاڑیوں پر بھی نظر رکھنا تھا۔

سابق چیئرمین کا کہنا تھا کہ ایک بار جب ہم بھارت گئے تو میں نے اس وقت کے بی سی سی آئی کے چیئرمین نارائن سوامی سری نواسن سے ملاقات کی تھی۔

اس ملاقات میں انہوں نے وعدہ کیا تھا کہ اگر فول پروف سیکیورٹی دی جائے تو بھارت کی کرکٹ ٹیم کو پاکستان کی سرزمین پر کھیلنے کی اجازت دے دی جائے گی۔

انہوں نے کہا کہ ہمیں کرکٹ کے حوالے سے بھارتی حکومت کے ساتھ ہمیشہ تعلقات بحال کرنے کی کوشش کرنی چاہیے۔

ذکا اشرف کا مزید کہنا تھا کہ ہمیں اس وقت سب سے بڑا فائدہ یہ ہے کہ جنرل باجوہ اس وقت موجود ہیں اور وہ خود پاکستان میں کرکٹ کو ترقی کرتا دیکھنا چاہتے ہیں۔