سابق چیئرمین پی سی بی توقیر ضیا کا کہنا ہے کہ بھارتی کرکٹ بورڈ نے کبھی پاکستان سے سیریز کھیلنے سے انکار نہیں کیا ہے۔

نجی کرکٹ کی ویب سائٹ سے گفتگو کرتے ہوئے پاکستان کرکٹ کرکٹ بورڈ کے سابق چیئرمین توقیر ضیا کا کہنا تھا کہ کہ بھارتی کرکٹ بورڈ نے کبھی پاکستان سے سیریز کھیلنے سے انکار نہیں کیا، مسئلہ حکومت سے حکومتی سطح پر ہے۔

ان کا کہنا تھا کہ دونوں ممالک کے کرکٹ بورڈ اس وقت سابق کرکٹرز چلارہے ہیں جو پاک بھارت میچز کی اہمیت کو بھی بخوبی سمجھتے ہیں۔

انہوں نے کہا کہ سورو گنگولی اور رمیز راجہ دونوں ہی کرکٹ کو فروغ دینا چاہتے ہیں، ان حریف ٹیموں کے درمیان مقابلہ دیکھنے سے بہتر کوئی چیز نہیں ہے۔

سابق چیئرمین کا کہنا ہے کہ اگرچہ چار ملکی سیریز اچھا آئیڈیا تھا جس میں بھارت بھی شامل تھا تاہم عملی طور پر ایسا ہونا ممکن نہیں ہے۔

انہوں نے مزید کہا کہ ان ممالک میں بہت سے فرنچائز ماڈل ٹورنامنٹ ہورہے ہیں جس کی وجہ سے مجھے نہیں لگتا کہ ان چاروں ممالک کی ٹیموں کو ایک جگہ جمع کرنا آسان ہوگا۔

واضح رہے کہ پاکستان کرکٹ بورڈ کے چیئرمین رمیز راجہ نے چار ملکی سیریز کا آئیڈیا پیش تھا جس میں آسٹریلیا، انگلینڈ، بھارت اورپاکستان شامل تھا۔

یہ تجویز حال ہی میں آئی سی سی کے اجلاس میں پیش کی گئی تھی جس پر زبردست بحث کی گئی تھی تاہم اس تجویز کو اجلاس میں مسترد کردیا گیا تھا۔