انگلینڈ کے خلاف اگلے ٹیسٹ میچ میں روہت شرما کی شرکت مشکوک نظر آرہی ہے جس کے ساتھ ہی بھارتی ٹیم میں کپتانی کا مسئلہ کھڑا ہوگیا ہے۔

لیسٹر شائر کے خلاف وارم اپ میچ کے دوران روہت شرما کا کورونا ٹیسٹ مثبت آیا تھا جس کے بعد وہ میچ کی دوسری اننگ سے بھی محروم ہوگئے تھے۔

بھارتی ٹیم مینجمنٹ کا خیال ہے کہ روہت شرما یکم جولائی کو ہونے والے ٹیسٹ میچ سے قبل صحتیاب ہوجائیں گے لیکن اگر ایسا نہ ہوا تو بھارتی ٹیم میں کپتانی کا مسئلہ کھڑا ہوجائے گا جبکہ نائب کپتان کے ایل روہول نے بھی تصادم سے بچنے کے لیے کپتانی سے انکار کردیا ہے۔

واضح رہے کہ یہ سیریز دونوں ٹیموں کے لیے اہمیت کی حامل ہے کیونکہ یہ میچز آئی سی سی ورلڈ ٹیسٹ چیمئنز شپ میں پوائنٹس ٹیبل پر گرفت کو مضبوط کریں گے۔

بھارتی کرکٹ ٹیم میں اب بھی کچھ ایسے کھلاڑی موجود ہیں جو اس خلاء کو پر کرنے کی صلاحیت رکھتے ہیں، ان میں سے چند کھلاڑیوں پر ایک نظر ڈالتے ہیں۔

جسپریت بمراہ

اگر جسپریت بمراہ کو واقعی ٹیم کی قیادت سونپی جاتی ہے تو یہ بھارتی کرکٹ کے لیے ایک تاریخی لمحہ ہوگا کیونکہ بمراہ کپل دیو کے بعد سب سے طویل فارمیٹ میں بھارتی ٹیم کی کپتانی کرنے والے پہلے تیز گیند باز بن جائیں گے۔

اس سے قبل انہیں دورہ جنوبی افریقہ کے دوران نائب کپتان مقرر کیا گیا تھا جبکہ انہیں دورہ سری لنکا کے دوران بھی روہت شرما کی غیر موجودگی میں جب کے ایل راہول کو کپتان مقرر کیا گیا تھا تو وہ نائب کپتانی کے فرائض انجام دے رہے تھے۔

یہ بھی پڑھیں: ٹیسٹ چیمپئن شپ،انگلینڈ نے اپنی پوزیشن بہتر کرلی

یہاں یہ بات بھی قابل غور ہے کہ بمراہ نے اب تک بین الاقوامی میچز کے کسی بھی فارمیٹ میں بھارت کی قیادت نہیں کی ہے اور نہ ہی آئی پی ایل میں کسی ٹیم کے کپتان رہے ہیں۔

رشبھ پنت

ابھرتے ہوئے اسٹار کو بھارتی ٹیم کی انتظامیہ مستقبل کے کپتان کے طور پر تیار کر رہی ہے جبکہ انہیں آئی پی ایل میں قیادت کا بھی کافی تجربہ رہا ہے، انہوں نے دو سیزن میں دہلی کیپیٹلز کی قیادت کی ہے۔

بھارت میں ہونے والے جنوبی افریقہ کے خلاف 5 ٹی ٹوئنٹی میچز میں انہیں بھارتی ٹیم کا کپتان مقرر کیا گیا تھا لیکن ان کی بطور کپتان شروعات ٹیم کے لیے فائدہ مند ثابت نہیں ہوئی تھی جبکہ بھارتی ٹیم پانچویں میچ میں بارش کے باعث سیریز کی شکست سے بچ گئی تھی۔

تاہم اب یہ دیکھنا ہے کہ بھارتی ٹیم مینجمنٹ انگلینڈ کے خلاف اہم ٹیسٹ میچ میں رشبھ پنت کو آزماتی ہے یا نہیں۔

ویرات کوہلی

اس فہرست میں تیسرا نمبر بھارت کے سابق کپتان ویرات کوہلی کا ہے لیکن ویرات کوہلی پہلے ہی جنوبی افریقہ سے شکست کے بعد ٹیسٹ میچ کی کپتانی چھوڑ چکے ہیں لیکن دوبارہ ان کی قیادت پر کوئی سوال نہیں اٹھا سکتا۔

ویرات کوہلی کی ہی قیادت میں بھارتی ٹیم ٹیسٹ کرکٹ میں نئی بلندیوں کو عبور کرتے ہوئے ٹیسٹ میں نمبر ون ٹیم بن گئی تھی اور افتتاحی آئی سی سی ورلڈ ٹیسٹ چیمپئن شپ کے فائنل میں پہنچی تھی۔

ویرات کوہلی طویل ترین فارمیٹ میں بھارت کے سب سے کامیاب کپتان رہے ہیں، ان ہی کی قیادت میں بھارت نے 68 میں سے 40 ٹیسٹ میچز جیتے ہیں جبکہ جیت کا تناسب 58.82 فیصد رہا ہے۔