لاہو : ٹیسٹ کرکٹر احمد شہزاد کا کہنا ہے کہ وقار یونس کی میرے خلاف رپورٹ نے میرا کیریئر تباہی کی طرف دھکیل دیا ہے۔

ٹیسٹ کرکٹر احمد شہزاد کا مطالبہ کرتے ہوئے کہنا تھا کہ میں چاہتا ہوں کہ رپورٹ کو پبلک کیا جائے جس کی بنیاد پر مجھے ٹیم سے باہر رکھا ہوا ہے۔

انہوں نے کہا کہ میں نے کبھی کچھ غلط نہیں کیا، میرے پاس بھی اپنے دفاع کے لئے بہت کچھ ہے۔ اگر میں نے کچھ غلط کیا ہے تو مجھے اس کا بتایا جائے سزا دی جائے لیکن کیرئیر کے ساتھ کھیلا جا رہا ہے۔

ان کا کہنا ہے کہ رپورٹ میں جو کہا گیا اس کی وضاحت ہونی چاہیے کیونکہ مجھے اس کا بہت نقصان ہوا ہے، مجھے پتہ تو ہونا چاہیے کہ رپورٹ ہے کیا اور میں نے غلط کیا کیا ہے۔

احمد شہزاد کہتے ہیں میں کنڈکٹ کے تحت تمام چیزیں کررہا ہوں لیکن مجھے کارنر کرنے کی کوشش کی گئی ہے، میں نے رپورٹ کے بارے میں جاننے کی بہت کوشش کی لیکن مجھے کچھ حاصل نہیں ہوا۔

انہوں نے کہا کہ مجھے سری لنکا کے خلاف آخری سیریز میں پورا موقع ہی نہیں دیا گیا اور باہر کر دیا، مجھے خود نہیں پتہ کہ مجھے کنڈیشنگ کیمپ میں کیوں نہیں بلایا گیا۔

ٹیسٹ کرکٹر کا کہنا تھا کہ اس کا درست جواب تو وہی دے سکتے ہیں جنہوں نے کھلاڑیوں کو منتخب کیا، میں بھی کیمپ میں شامل ہو کر ایک معیاری ٹریننگ کرنا چاہتا تھا۔

انہوں نے مزید کہا کہ کوئٹہ گلیڈی ایٹرز میرا گھر ہے اور کوئٹہ کی ٹیم نے ہمیشہ اچھی کرکٹ کھیلی ہے، مجھے خود بڑا دکھ ہے کہ میں پی ایس ایل نہیں کھیل سکا۔

واضح رہے کہ اس سے قبل وقار یونس کی رپورٹ پر ردعمل دیتے احمد شہزاد کا کہنا تھا کہ سینئر کھلاڑیوں کو کامیابی ہضم نہیں ہوتی ہے۔

انہوں نے وقار ہونس کو چیلنج کرتے ہوئے کہا تھا کہ وہ ان کے سامنے بیٹھ کر معاملات پر بات کریں۔