انگلینڈ کے فاسٹ بولر رچرڈ گلیسن نے 34 سال کی عمر میں اپنے ڈیبیو میچ میں 8 گیندوں پر 3 وکٹیں لے کر سب کو حیران کر دیا۔

تفصیلات کے مطابق انگلینڈ کے دائیں ہاتھ کے تیز فاسٹ بولر رچرڈ گلیسن نے بھارت کے خلاف شاندار انداز میں انٹرنیشنل ڈیبیو کیا۔

رچرڈ گلیسن نے  نے بھارت کے خلاف اپنے پہلے ہی ٹی ٹوئنٹی میچ میں 8 گیندوں پر روہت شرما، ویرات کوہلی اور رشبھ پنت کو پویلین بھیجا۔

خاص بات یہ ہے کہ رچرڈ گلیسن نے 27 سال کی عمر تک پیشہ ور کرکٹ نہیں کھیلی، اور تو اور وہ تقریباً 8 ماہ پہلے چوٹ کے سبب ریٹائرمنٹ کے بارے میں سوچ رہے تھے۔

انگلینڈ کے کپتان جوز بٹلر نے اس مقابلے میں ٹاس جیتا اور پہلے فیلڈنگ کا فیصلہ کیا۔

بھارت کے کپتان روہت شرما نے رشبھ پنت کے ساتھ اوپننگ کی ذمہ داری سنبھالی۔ دونوں نے 49 رنوں کی شراکت کی۔

اس شراکت کو گلیسن نے اپنے پہلے ہی اوور میں توڑا۔ گلیسن نے اننگ کے پانچویں اور اپنے پہلے  اوور کی پانچویں گیند پر روہت شرما کو بٹلر کے ہاتھوں کیچ کرا دیا۔

گلیسن نے اننگ کے ساتویں اور اپنے دوسرے اوور میں کمال دکھایا اور مسلسل دو گیندوں پر ویرات کوہلی اور رشبھ پنت کو پویلین بھیج دیا۔

گلیسن کی پہلی گیند پر ویرات کوہلی کو ڈیوڈ ملان کے ہاتھوں کیچ کرایا۔ پھر اگلی ہی گیند پر رشبھ پنت کو وکٹ کے پیچھے بٹلر نے لپک لیا، جس سے ہندوستان کا اسکور 3 وکٹ پر 61 رن ہوگیا۔

اس طرح گلیسن نے اپنے پہلے ہی میچ میں شروعاتی 8 گیندوں پر 3 وکٹ حاصل کئے۔

رچرڈ گلیسن نے اس سے پہلے تک صرف 34 فرسٹ کلاس میچ کھیلے اور 3.31 کے اکنامی ریٹ سے کل 143 وکٹ حاصل کئے۔

انہوں نے 21 لسٹ اے میچوں میں بھی 28 وکٹ حاصل کئے ہیں۔ وہ 2016 میں نارتھمپٹن شائر ٹیم کے لئے نیٹ ویسٹ ٹی ٹوئنٹی بلاسٹ میں اہم رکن رہے اور انہوں نے زبردست کارکردگی پیش کی تھی۔