ایشیا کپ کی میزبانی میں ایک اوراہم پیش رفت سامنے آئی ہے، سری لنکا میں سیاسی و معاشی کشیدگی کے باعث ایشیا کپ کی میزبانی یو اے ای میں کروائے جانے کا امکان ہے۔

ایشین کرکٹ کونسل حکام کی عرب امارات کے ممبر بورڈز سے ملاقاتیں اور بات چیت جاری ہے۔

اے سی سی ذرائع کا کہنا ہے کہ ایشین کرکٹ کونسل پرانی تاریخوں پر ایونٹ یو اے ای لیجانے کا پلان تیار کیا جارہا ہے۔

اے سی سی ذرائع کا کہنا تھا کہ سری لنکا بورڈ نے حکومت کے دباؤ میں آکر ایونٹ کی میزبانی پاس رکھی ہوئی ہے، گزشتہ ایک ہفتے کے دوران حالات یکسر بدل چکے ہیں، ملک کے صدر فرار ہوگئے، ملک سیاسی اسٹیبلشمنٹ کے خلاف پرتشدد مظاہروں میں شدت آرہی ہے۔

اے سی سی آفیسر نے بتایا کہ ایسے حالات میں محسوس کیا جا رہا ہے کہ ایونٹ کی میزبانی مناسب نہیں ہے۔

پاکستان کرکٹ بورڈ کی جانب سے سری لنکا کرکٹ اور ایشین کرکٹ کونسل سے رابطہ کیا گیا جس میں پی سی بی نے موقف دیا کہ ہماری پہلی ترجیح سری لنکا کو سپورٹ کرنا اور وہاں ایشیا کپ کھیلنا ہے۔

پی سی بی نے کہا کہ ٹورنامنٹ سری لنکا میں نہیں ہوا تو سری لنکا کا بہت بڑا کرکٹ اور مالی نقصان ہوگا۔

پی سی بی کا یہ بھی کہنا تھا کہ یہ فیصلہ سری لنکا کرکٹ اور اے سی سی نے کرنا ہے۔

خیال رہے کہ ایشیا کپ رواں سال اگست میں سری لنکا میں شیڈول ہے تاہم وہاں پر سیاسی گشیدگی کے باعث فیصلہ سازوں کو اس حوالے سے مشکلات پیش آرہی ہیں کہ وہ ایشیا کپ سری لنکا میں ہی کروائیں یا پھر اسے کسی اور منتقل کردیا جائے اور اس حوالے سے حتمی فیصلہ ایشین کرکٹ کونسل رواں ماہ کے آخر میں کرے گا۔

اس سے قبل بھارتی میڈیا نے دعویٰ کیا تھا کہ موجودہ صورتحال کے باعث سری لنکا کی ایشیا کپ کی میزبانی خطرے میں پڑ گئی ہے اور بنگلادیش نے ایشیا کپ کرانے کی تیاریاں شروع کردی ہیں۔

دوسری جانب سری لنکا کرکٹ بورڈ کو بھی امید ہے کہ ایشیا کپ شیڈول کے مطابق سری لنکا میں ہی ہوگا اور ایونٹ کے کسی دوسرے ملک منتقل کرنے کی خبروں میں کوئی صداقت نہیں ہے۔

سری لنکا بورڈ کے سیکریٹری موہن ڈ ی سلوا نے ایک بیان میں کہا کہ  ہم ٹورنامنٹ کے انعقاد کیلئے پُر امید ہیں۔ حال ہی میں 52 دن کے لئے آسٹریلیا کی میزبانی کی ہے اور اب پاکستانی ٹیم سری لنکا میں موجود ہے۔

واضح رہے کہ ایشیا کپ ٹورنامنٹ 26 اگست سے 11 ستمبر تک شیڈولڈ ہے۔