قومی ٹیم کے بیٹر افتخار احمد کہتے ہیں کہ ہمیں اپنی غلطیوں سے سبق سیکھنے کی ضرروت ہے، زمبابوے کے خلاف میچ میں دوبارہ سے کم بیک کریں گے۔

آسٹریلیا میں ٹی ٹوئنٹی ورلڈ کپ کے سپر 12 مرحلے کے میچز جاری ہیں جس میں پاکستان نے اپنی مہم کا آغاز روایتی حریف بھارت سے کیا۔

اس میچ میں قومی ٹیم کو ویرات کوہلی کے ناقابل شکست 82 رنز کی وجہ سے شکست کا سامنا کرنا پڑا جس کے بعد قومی کھلاڑی کافی دکھی نظر آئے۔

پاکستان کا اگلا مقابلہ جمعرات کو زمبابوے سے ہوگا جس میں پاکستان کے پاس مزید غلطی کی گنجائش باقی نہیں جب کہ اس میچ میں جیت سے کھلاڑیوں کے اعتماد میں اضافہ ہوگا۔

بھارت کے خلاف 51 رنز کی اننگز کھیلنے والے مڈل آرڈر بلے باز افتخار احمد کا خبر رساں ادارے سے گفتگو کرتے ہوئے کہنا تھا کہ بھارت کے خلاف شکست کی وجہ سے کھلاڑی کافی دکھی تھے اور ہمارے دل ٹوٹ گئے تھے۔

انہوں نے کہا کہ تکلیف کے باوجود ہمارے حوصلے بلند ہیں جب کہ اس موقع پر انہوں نے بھارت کے خلاف شکست کے بعد ٹیم کو سنبھالنے پر بابر اعظم کی بھی تعریف کی۔

افتخار احمد کہتے ہیں کہ ’جس طرح سے بابر اعظم اور انتظامیہ نے کھلاڑیوں کی حمایت کی وہ قابل تعریف ہے‘، کپتان اور کوچز نے ہمیں بتایا کہ یہ ہمارا آخری میچ نہیں تھا اور سب سے بھرپور کوشش کی تھی۔ لہذا اب ہمارے حوصلے بلند ہیں۔

زمبابوے کے خلاف میچ کے بارے میں گفتگو کرتے ہوئے ان کا کہنا تھا کہ زمبابوے ایک بین الاقوامی ٹیم ہے اور ہمیں ان کے خلاف کسی بھی دوسری ٹیم کی طرح مضبوط کھیلنا ہوگا۔

مڈل آرڈر بلے باز کہتے ہیں کہ اچھا کھیلنا اور اعتماد برقرار رکھنا ضروری ہے، کھلاڑی پرفارم کرنے کے بھوکے ہیں۔

انہوں نے مزید کہا کہ آسٹریلوی پچز تیز اور باؤنسی ہیں اور ہم نے اس کے لیے تیاری کر رکھی ہے، حارث رؤف اہم اسٹرائیک بولر ہیں اور ہم توقع کرتے ہیں کہ وہ یہاں بہتر بولنگ کریں گے اور پاکستان کے لیے جیتیں گے۔