نیوزی لینڈ کرکٹ کے سی ای او ڈیوڈ وائٹ کا کہنا ہے کہ نیوزی لینڈ کے کھلاڑیوں کو دورہ پاکستان اور آئی پی ایل میں سے کسی ایک کا انتخاب کرنے کی اجازت ہوگی۔

نیوزی لینڈ کرکٹ کے سی ای او ڈیوڈ وائٹ کے مطابق ایک مکمل قوت والی ٹیم دسمبر 2022 اور جنوری 2023 میں شیڈول دورے کے پہلے مرحلے کے لیے پاکستان کا دورہ کرے گی۔

ان کا کہنا ہے کہ دورہ پاکستان کے موقع پر دو ٹیسٹ میچز کھیلے جائیں گے جو آئی سی سی ورلڈ ٹیسٹ چیمپئن شپ کا حصہ ہیں جب کہ دو ورلڈ کپ سپر لیگ کے میچز بھی اس دورے کا حصہ ہوں گے۔

دوسرے مرحلے میں نیوزی لینڈ کی ٹیم اپریل اور مئی 2023 میں دوبارہ پاکستان کا دورہ کرے گی، اس موقع پر 5 ٹی ٹوئنٹی اور 5 ون ڈے میچز کھیلے جائیں گے جب کہ اس دورے کی تاریخی آئی پی ایل سے متصادم ہوں گی۔

نیوزی لینڈ میڈیا کا دعویٰ ہے کہ دورہ پاکستان کے دوسرے مرحلے کی تاریخیں آئی پی ایل سے متصادم ہونے کی وجہ سے کئی کیویز کرکٹر دستیاب نہیں ہوں گے۔

اس حوالے سے نیوزی لینڈ کرکٹ کے سی ای او ڈیوڈ وائٹ کا کہنا تھا کہ ’میرے مطابق نیوزی لینڈ کی مکمل قوت والی ٹیم ہی پاکستان کا دورہ کرے گی‘۔

انہوں نے کہا کہ اس حوالے سے میری کھلاڑیوں اور ان کی ایسوسی ایشنز سے کوئی بات نہیں ہوئی ہے لیکن کھلاڑیوں کو آئی پی ایل میں کھیلنے کی اجازت ہوگی اور وہ دورہ پاکستان یا آئی پی ایل میں سے کسی ایک کا انتخاب کرنے کے لیے آزاد ہیں۔

ڈیوڈ وائٹ کہتے ہیں کہ ہمارے وفد نے اس سال کے شروع میں پاکستان کا دورہ کیا تھا اور انہیں سیکیورٹی پر مکمل اعتماد ہے تاہم اس حوالے سے ہم نیوزی لینڈ کی حکومت اور سفارت خانے سے مکمل رابطے میں ہیں۔

واضح رہے کہ نیوزی لینڈ کرٹ ٹیم نے گذشتہ سال راولپنڈی مین پہلے ون ڈے سے قبل ہی سیکیورٹی خدشات کا بہانہ بناکر دورہ پاکستان منسوخ کردیا تھا۔