پاکستان کرکٹ ٹیم کے فاسٹ بولر شاہین آفریدی انجری سے صحتیاب ہونے کے سفر کو مشکل ترین قرار دیتے ہیں۔

شاہین آفریدی رواں سال جولائی میں سری لنکا کے خلاف پہلے ٹیسٹ میچ کے دوران گھٹنے کی انجری کا شکار ہوئے تھے۔

انجری سے صحتیاب ہونے کے بعد انہوں نے ٹی ٹوئنٹی ورلڈ کپ میں واپسی کی ہے جب کہ انہوں نے انگلینڈ اور افغانستان کے خلاف وارم اپ میچز بھی کھیلے ہیں۔

پاکستان کرکٹ بورڈ کی جانب سے حارث رؤف کے ساتھ شاہین آفریدی کی ایک ویڈیو جاری کی گئی ہے جس میں شاہین آفریدی نے اپنی انجری سے بحالی کے سفر کے بارے میں بیان کیا ہے۔

Shaheen Shah Afridi's road to recovery 🦅

Advertisement

Full video 👉 https://t.co/Ep6SORK2Fo#T20WorldCup | #WeHaveWeWill pic.twitter.com/6iCAY3MuRX

— Pakistan Cricket (@TheRealPCB) October 20, 2022

شاہین آفریدی کا کہنا تھا کہ ’یہ بحالی کا ایک اٹل مرحلہ تھا جس کے اندر میں میدان میں کھیلنا بہت مس کرتا تھا لیکن کھیل سے دور ہونے کے باوجود میں اپنے ساتھیوں سے فون پر بات کرلیا کرتا تھا‘۔

انہوں نے بتایا کہ بحالی کے دوران انہیں بہت تکلیف اٹھانا پڑی، لیکن وہ پاکستان کے لیے ٹی ٹوئنٹی ورلڈ کپ 2022 کھیلنے کے لیے پر عزم تھے۔

ان کا کہنا تھا کہ ’پہلے تو میں چل بھی نہیں پارہا تھا لیکن میرا مقصد ٹی ٹوئنٹی ورلڈکپ کھیلنا تھا اور میں نے اپنی توجہ ڈاکٹروں کے مشوروں پر مرکوز کررکھی تھی‘۔

انہوں نے مزید کہا کہ ’مجھے اس سے قبل کبھی ایسی چوٹ نہیں لگی اور بریسز (دھانتوں کی تاریں) کے ساتھ چلنے کا احساس کافی مشکل تھا، میں نے درد کے تجربے کو استعمال کرتے ہوئے چیزوں کو آہستہ آہستہ لیا اور فائدہ اٹھایا‘۔

شاہین نے اپنی بحالی کے دوران صبر سے کام لینے کی اہمیت پر بھی زور دیا اور اپنے مداحوں کی مسلسل حمایت پر ان کا شکریہ ادا کیا۔

واضح رہے کہ شاہین آفریدی کو ٹی ٹوئنٹی ورلڈ کپ کے لیے پاکستان ٹیم کا اہم بولر قرار دیا جارہا ہے جب کہ مداحوں کی ان سے بہت سی امیدیں وابستہ ہیں۔

فاسٹ بولر نے 2018 میں ڈیبیو کرنے کے بعد سے اب تک 25 ٹیسٹ، 32 ون ڈے اور 40 ٹی ٹوئنٹی انٹرنینشل میچز کھیلے ہیں۔

ٹی ٹوئنٹی ورلڈ کپ کے سپر 12 مرحلے میں پاکستان کا پہلا مقابلہ 23 اکتوبر کو روایتی حریف بھارت سے ہوگا جب کہ دوسرا مقابلہ 27 اکتوبر اور تیسرا 30 اکتوبر کو کھیلا جائے گا۔