بھارت کے لیجنڈری بلے باز سچن ٹنڈولکر کا کہنا ہے کہ بھارتی ٹیم میں بائیں ہاتھ کے بلے باز کی ضرروت ہے۔

بھارت کے سابق کپتان اور لیجنڈری بلے باز سچن ٹنڈولکر نے مینز ٹی ٹوئنٹی ورلڈ کپ کے لیے بھارتی ٹیم میں بائیں ہاتھ کے بلے باز کی اہمیت پر زور دیتے ہوئے کہا کہ ’بائیں ہاتھ کے بلے باز قدر میں اضافہ کرتے ہیں‘۔

سچن ٹنڈولکر کا کہنا تھا کہ بائیں ہاتھ کے بلے بازوں کی وجہ سے بولرز اور فیلڈروں کو ایڈجسٹ کرنا پڑتا ہے جو مسلسل اسٹرائیک روٹیٹ کرنے کے قابل ہوتا ہے جب کہ اس کی وجہ سے بولر لطف اندوز نہیں ہوتے۔

بھارتی ٹیم میں رشبھ پنت ٹاپ آرڈر پر واحد بلے باز ہیں جب کہ اکشر پٹیل بھی موجود ہیں لیکن وہ نچلی پوزیشن پر بیٹنگ کرتے ہیں۔

واضح رہے کہ رویندرا جدیجہ گھٹنے کی انجری کے باعث باہر ہوگئے ہیں جس کی وجہ سے بھارتی ٹیم کو بڑا دھچکا لگا ہے۔

رواں سال جون سے لے کر اب تک ٹی ٹوئنٹی انٹرنیشنل کی 15 اننگز میں رشبھ پنت نے 23 کی اوسط سے رنز کیے ہیں جب کہ انہوں نے سب سے زیادہ 44 رنز اسکور کیے ہیں۔

رشبھ پنت کی حالیہ پرفارمنس کو دیکھتے ہوئے ٹیم میں ان کی موجودگی پر سوالات اٹھائے جارہے ہیں جب کہ انہیں ایشیاکپ میں پاکستان اور آسٹریلیا کے خلاف سیریز کے میچز میں بھی پلیئنگ الیون سے باہر کردیا گیا تھا۔

سچن ٹنڈولکر کہتے ہیں کہ ’میں ٹاپ تھری کے حوالے سے بات نہیں کرتا، آپ ہمیشہ ایک یونٹ کے طور پر کھیلتے ہیں لیکن آپ ٹاپ ٹو یا ٹاپ تھری میں نہیں جاسکتے‘۔

ایک یونٹ کے طور پر آپ کے پاس جو ہے وہ اہم ہے لیکن آپ کو اپوزیشن کی طاقت کو دیکھتے ہوئے یہ دیکھنا ہوگا کس کو کس پوزیشن پر بھیجنا ہے۔

انہوں نے کہا کہ ’وہ ارشدیپ سنگھ سے بہت متاثر ہیں، جنہوں نے آئی پی ایل میں اچھی کارکردگی کا مظاہرہ کرتے ہوئے جولائی میں اپنا ٹی ٹوئنٹی انٹرنیشنل ڈیبیو کیا ہے‘۔

ان کا کہنا تھا کہ ارشدیپ سنگھ ایک متوازن آدمی ہیں اور جو کچھ بھی میں نے ان کے بارے میں دیکھا ہے تو وہ ایک پرعزم ساتھی لگتے ہیں۔

ارشدیپ سنگھ کی تعریف کرتے ہوئے سچن ٹنڈولکر نے مزید کہا کہ ’مجھے جو بات ارشدیپ سنگھ کی پسند ہے، وہ یہ ہے کہ اگر ان کے پاس کوئی منصوبہ ہو تو وہ اس پر عمل کرتے ہیں جو اس فارمیٹ میں اہمیت رکھتا ہے‘۔