راولپنڈی ایکسپریس شعیب اختر نے بھارت کے فائنل کھیلنے کی خواہش کا اظہار کردیا ہے۔

ٹی ٹوئنٹی ورلڈ کپ کے سیمی فائنل میں قومی ٹیم کی فتح کے بعد سابق فاسٹ بولر شعیب اختر کا ردعمل سامنے آیا ہے جس میں انہوں نے بھارت کے فائنل کھیلنے کی خواہش کا اظہار کیا ہے۔

اس حوالے سے شعیب اختر نے سماجی رابطے کی سائٹ پر ایک ویڈیو بیان شیئر کیا جس میں انہوں نے بھارت کے کل کے میچ کے لیے نیک خواہشات کا اظہار کیا۔

Dear India, good luck for tomorrow. We'll be waiting for you in Melbourne for a great game of cricket. pic.twitter.com/SdBLVYD6vm

— Shoaib Akhtar (@shoaib100mph) November 9, 2022

کیپشن میں انہوں نے لکھا کہ ’کرکٹ کے شاندار کھیل کے لیے ہم میلبورن میں آپ کا انتظار کریں گے‘۔

ویڈیو بیان میں ان کا کہنا تھا کہ ’جی ہندوستان، ہم میلبرن پہنچ چکے ہیں اور آپ کا انتظار کررہے ہیں۔ آپ آجائیں اور ہماری نیک خواہشات آپ کے ساتھ ہیں کہ آپ کل کے میچ میں انگلینڈ کو پھینٹی لگاکر میلبرن پہنچیں‘۔

انہوں نے کہا کہ ’ہم نے 1992 میں انگلینڈ کو ہی میلبرن کے گراؤنڈ میں مارا تھا اور اب 2022 ہے، بس یہ فرق ہے لیکن نمبر ایک جیسے ہیں‘۔

شعیب اختر کا مزید کہنا تھا کہ ’میری خواہش ہے کہ پاکستان اور ہندوستان کا فائنل ہو، دونوں ٹیموں کے درمیان ایک اور میچ ہونا چاہیے جس کا پوری دنیا بے تابی سے انتظار کررہی ہے‘۔

واضح رہے کہ آج ٹی ٹوئنٹی ورلڈکپ کے پہلے سیمی فائنل میں پاکستان نے 7 وکٹوں سے کامیابی اپنے نام کرکے فائنل تک رسائی حاصل کرلی ہے۔

کل بھارت اور انگلینڈ کے درمیان دوسرا سیمی فائنل میچ ہونا باقی ہے جس میں کامیابی حاصل کرنے والی ٹیم اتوار کو فائنل میں پاکستان کے مدمقابل ہوگی۔