ارب پتی پی سی بی بلند و بانگ دعوؤں کے باجود ڈومیسٹک پلیئرز کو ادائیگی نہیں کرسکا۔

ارب پتی پاکستان کرکٹ بورڈ (پی سی بی) نے مالی حالت بہتر بنانے کے بڑے بڑے دعوے کرنے کے باوجود غریب کرکٹرز کو اپنے معاوضوں کے لیے رلا دیا ہے۔

رپورٹس کے مطابق پی سی بی نے کھلاڑیوں کو گذشتہ پانچ ماہ سے ماہانہ ریٹینرز ادا نہیں کیے ہیں اور نہ ہی انہیں میچ فیس ادا کی گئی ہے۔

سندھ کی کرکٹ ٹیم کو قومی ٹی ٹوئنٹی کپ جیتنے کے باوجود بھی اب تک انعامی رقم نہیں ملی ہے۔

واضح رہے کہ گزشتہ دورِ حکومت میں ڈومیسٹک کرکٹ کا نظام تبدیل ہونے سے سینکڑوں کرکٹرز بے روزگار ہو گئے تھے جب کہ ڈیپارٹمنٹل کھیل کے بند ہونے سے ان کی آمدنی کا بڑا ذریعہ بھی ختم ہوگیا تھا۔

حالانکہ موجودہ وزیر اعظم شہباز شریف نے ڈیپارٹمنٹل کھیلوں کی بحالی کا اعلان کیا تھا لیکن اب تک اس سلسلے میں کوئی پیش رفت نہیں ہوئی ہے۔

بورڈ کی موجودہ انتظامیہ نے کھلاڑیوں کے معاوضے میں اضافے اور ریونیو میں اضافے کے بڑے دعوے تو کیے لیکن ابھی تک بہتری دیکھنے میں نہیں آئی۔

ذرائع کا کہنا ہے کہ جولائی سے ڈومیسٹک کرکٹرز کو ماہانہ تنخواہ اور میچ فیس نہیں ملی ہے جب کہ اس صورت حال میں بے روزگار کھلاڑیوں کا اپنا کچن چلانا بھی مشکل ہوتا جا رہا ہے۔

          یاد رہے کہ نیشنل ٹی ٹوئنٹی کپ کے فائنل کو بھی ڈھائی ماہ کا عرصہ گزر چکا ہے جس کی انعامی رقم ادا نہیں کی گئی ہے۔