پاکستان کے مشہور باکسر عامر خان نے اسپورٹس بورڈ پنجاب آمد پر ڈی جی اسپورٹس پنجاب محمد طارق قریشی سے نیشنل ہاکی اسٹیڈیم میں ملاقات اور میڈیاسے گفتگو کی۔

تفصیلات کے مطابق ڈی جی اسپورٹس پنجاب محمد طارق قریشی نے میڈیا سے گفتگو کرتے ہوئے کہا کہ عامرخان کے ساتھ مل کر باکسنگ اکیڈمی بنائیں گے،وزیراعلیٰ پنجاب کی ہدایت پرباکسنگ اکیڈمی کیلئے انتظامات کررہے ہیں۔

انہوں نے کہا کہ ہمارے ملک میں باکسنگ کا بہت ٹیلنٹ ہے،عامرخان کی کوچنگ سے نیا ٹیلنٹ سامنے آئے گا۔

اس موقع پر باکسر عامر خان کا کہنا تھا کہ وزیراعلیٰ پنجاب سے ملاقات ہوئی ہے جس میں باکسنگ کے ٹیلنٹ کو سامنے لانے کا فیصلہ ہوا ہے۔

انٹرنیشنل باکسر کا کہنا تھا کہ لاہور میں باکسنگ اکیڈمی اسپورٹس بورڈ پنجاب کے ساتھ مل کر بنانے جارہے ہیں۔

انہوں نے کہا کہ ڈی جی اسپورٹس پنجاب محمد طارق قریشی سے باکسنگ کے فروغ کیلئے بات ہوئی ہے، جیسے اسلام آباد میں اکیڈمی قائم کی ہے اور کئی نامور باکسر سامنے آئے، محمد وسیم اور عثمان وزیر بھی ہماری اکیڈمی سے نکلے ہیں۔

عامر خان کا کہنا تھا کہ یہاں باکسنگ ایرینا بنانے کیلئے جگہ دیکھ رہے ہیں۔

انٹرنیشنل باکسر عامر خان نے ڈی جی اسپورٹس پنجاب کے ساتھ نشترپارک اسپورٹس کمپلیکس کا بھی دورہ کیا جہاں ڈائریکٹرایڈمن سید عمیر حسن بھی ساتھ تھے۔