کراچی: پی سی بی نے نیوزی لینڈ کے خلاف دوسرے ٹیسٹ میں شائقین کے لیے مفت انٹری کا اعلان کر دیا ہے۔

پاکستان اور نیوزی لینڈ کی ٹیموں کے درمیان کراچی کے نیشنل بینک کرکٹ ایرینا میں ٹیسٹ سیریز جاری ہے جس کا دوسرا ٹیسٹ 2 سے 6 جنوری کے دوران کھیلا جائے گا۔

تاہم پاکستانی کرکٹ شائقین کے لیے بڑی خوش خبری سامنے آگئی ہے، پی سی بی نے کراچی میں کھیلے جانے والے دوسرے ٹیسٹ میچ میں تماشائیوں کے لیے مفت داخلے کا اعلان کیا ہے۔

شائقین کو اسٹیڈیم میں داخل ہونے کے لیے صرف اپنا اصل شناختی کارڈ یا ب فارم لانا ہوگا، تماشائی کسی بھی پریمیم یعنی عمران خان، قائد، وسیم اکرم اور ظہیر عباس انکلوژرز سے بلا معاوضہ ایکشن دیکھ سکیں گے۔

تماشائی آصف اقبال، وقار حسن اور ماجد خان، محمد برادران اور انتخاب عالم انکلوژرز سے بھی بلا معاوضہ میچ دیکھ سکیں گے۔

نیشنل اسٹیڈیم اور غریب نواز پارکنگ ایریا کے درمیان شائقین کی اسٹیڈیم تک رسائی میں آسانی کے لیے شٹل بھی چلائی جائے گی۔

اس سے قبل دونوں ٹیموں کے درمیان پہلا ٹیسٹ میچ کھیلا گیا جو بے نتیجہ رہا جب کہ کم روشنی کے باعث پانچویں دن کا کھیل ختم کردیا گیا تھا۔

یہ بھی پڑھیں: کراچی ٹیسٹ: کین ولیمسن کی ڈبل سنچری، نیوزی لینڈ نے 612 رنز پر اننگز ڈکلیئر کردی

پہلے ٹیسٹ میں پاکستان نے ٹاس جیت کر پہلے بیٹنگ کرتے ہوئے 438 رنز بنائے تھے جس کے جواب میں نیوزی لینڈ نے 9 وکٹوں کے نقصان 612 رنز پر اننگز ڈکلیئر کردی تھی۔

بعد ازاں دوسری اننگز میں پاکستان نے 8 وکٹوں کے نقصان پر 311 رنز پر اپنی اننگز ڈکلیئر کی اور نیوزی لینڈ کو جیت کے لیے 138 رنز کا ہدف دیا تھا۔