پاکستان کرکٹ ٹیم کے ہیڈ کوچ ثقلین مشتاق انگلینڈ کے خلاف ملتان ٹیسٹ میں قومی کھلاڑیوں کی کارکردگی سے مطمئن ہیں۔

قومی ٹیم کے ہیڈ کوچ ثقلین مشتاق کا نیوز چینل پر گفتگو کرتے ہوئے کہنا تھا کہ ’میں ملتان ٹیسٹ میں قومی ٹیم کے کھلاڑیوں کی کارکردگی سے خوش ہوں، انگلینڈ کی ٹیم ایک تجربہ کار کھلاڑیوں پر منحصر ہے جب کہ پاکستانی کھلاڑیوں کو ریڈ بال کا زیادہ تجربہ نہیں ہے‘۔

ثقلین مشتاق نے شاندار شراکت داری قائم کرنے پر مڈل آرڈر بلے باز سعود شکیل اور محمد نواز کی تعریف کی اور کہا کہ ان کی جتنی تعریف کی جائے کم ہے۔

انہوں نے کہا کہ ’امام الحق نے اسپتال سے آکر اچھی بیٹنگ کی جس پر میں خوش ہوں لیکن بدقسمتی سے نتیجہ ہمارے حق میں نہیں گیا‘۔

ان کا کہنا تھا کہ آپ یا تو جیتیں یا سیکھیں، مجھے امید ہے کہ کھلاڑیوں نے بہت کچھ سیکھا ہوگا۔ ہم ان غلطیوں کا جائزہ لیں گے جو ہم سے ہوئی ہیں۔

علاوہ ازیں ثقلین مشتاق نے انکشاف کیا کہ کراچی کے نیشنل بینک کرکٹ ایرینا میں ہونے والے تیسرے ٹیسٹ کے لیے اسپن ٹریک بنایا جائے گا۔

واضح رہے کہ ملتان ٹیسٹ میں پاکستان کو 26 رنز سے شکست کا سامنا کرنا پڑا تھا جب کہ انگلینڈ نے تین میچوں کی سیریز میں 2-0 کی ناقابل تسخیر برتری حاصل کرلی ہے۔

1959 کے بعد پاکستان کا یہ سب سے خراب ہوم سیزن رہا ہے جب کہ سیریز میں شکست کے بعد قومی ٹیم ورلڈ ٹیسٹ چیمپئن شپ کی دوڑ سے باہر ہوگئی ہے۔