انگلینڈ کے خلاف دوسرے ٹیسٹ میں ڈیبیو کرنے والے اسپنر ابرار احمد نے اپنی زندگی کا بہترین لمحہ بتادیا ہے۔

پاکستان اور انگلینڈ کی ٹیموں کے درمیان ملتان کرکٹ اسٹیڈیم میں دوسرا ٹیسٹ میچ جاری ہے جس کے پہلے دن کا کھیل آج کھیلا گیا جو پاکستانی مسٹری اسپنر ابرار احمد کے نام رہا۔

ابرار احمد نے انگلینڈ کے خلاف پہلی اننگز میں جارحانہ بولنگ کا مظاہرہ کیا اور 114 رنز دے کر 7 کھلاڑیوں کے آؤٹ کیا جب کہ پانچ کھلاڑیوں کو انہوں نے کھانے کے وقفے سے قبل ہی پویلین لوٹا دیا تھا۔

انگلینڈ کے خلاف تاریخی بولنگ کرنے کے بعد قومی کرکٹر ابرار احمد نے ملتان میں پریس کانفرنس کی جس میں انہوں نے اپنی زندگی کے بہترین لمحے کے بارے میں بتایا۔

ابرار احمد کہتے ہیں اللہ کا شکر ادا کرنا چاہتا ہوں، ہیڈ کوچ نے گزشتہ شام ہی بتایا تھا کہ آپ کل کھیل رہے ہو۔

انہوں نے کہا کہ پچ پر زیادہ فوکس نہیں، پرفارمنس پر توجہ ہے، بطور کرکٹر ہر قسم کی وکٹ پر کھیلنے کے لئے تیار رہتا ہوں۔

ان کا کہنا تھا کہ انگلینڈ کے خلاف سات آؤٹ کرنے پر بے حد خوشی ہوئی، جوئے روٹ اور بین اسٹوک کو آؤٹ کرنا خواب تھا جب کہ بین اسٹوک کو آؤٹ کرنا بہترین لمحہ تھا۔

ابرار احمد نے بتایا کہ سرفراز احمد کے ساتھ بہت اچھا تعلق ہے، انہوں نے جانے سے پہلے یہی کہا تھا کہ سندھ کا میچ سمجھ کر کھیلو۔

انہوں نے مزید کہا کہ پہلے مسٹری اسپنرتھا لیکن اب لیگ اسپن پر زیادہ فوکس کر رہا ہوں۔

واضح رہے کہ انگلینڈ کے خلاف 7 وکٹیں حاصل کرکے ابرار احمد ڈیبیو ٹیسٹ میں 5 وکٹیں لینے والے 13 ویں اور 7 وکٹیں لینے والے تیسرے پاکستانی بولر بن گئے ہیں۔