بابر اعظم کی کپتانی پر تنقید کرنے والے سابق انگلش کپتان ناصر حسین اب ان کے حق میں بول پڑے ہیں۔

ایک انٹرویو کے دوران سابق انگلش کپتان ناصر حسین کا کہنا تھا کہ لوگوں کو اندازہ نہیں ہے کہ بابر کس قدر اچھے ہی، ان کی قدر اس وقت ہوگی جب وہ چلے جائیں گے۔

انہوں نے کہا کہ بابر اعظم کے پاس ایک خاص ٹیلنٹ موجود ہے جب کہ پاکستان کو اس وقت تک کپتان تبدیل نہیں کرنا چاہیے جب تک آپ کے پاس کوئی اس سے اچھا آپشن نہ پو۔

ان کا کہنا تھا کہ بابر ایک اچھے کپتان ہیں لیکن وہ اپنے فیلڈرز کو فیلڈ سے دور رکھتے ہیں جب کہ وہ انگلش کپتان بین اسٹوکس کی طرح پارٹ ٹائمرز کا استعمال نہیں کرتے ہیں۔

سابق انگلش کپتان کا پاکستان ٹیم کو مشورہ دیتے ہوئے کہنا تھا کہ ’انہیں اپنے فاسٹ بولرز کو آرام کا موقع دینا چاہیے اور انہیں تبدیل کرتے رہنا چاہیے‘۔

ناصر حسین کا کہنا ہے کہ شاہین آفریدی اور نسیم شاہ پاکستان کے اہم بولرز ہیں جب کہ انہیں تینوں فارمیٹس میں کھلانے کے باعث محتاط رہنے کی ضرورت ہے۔

واضح رہے کہ سابق انگلش کپتان نے اس سے قبل کراچی ٹیسٹ میں بابر اعظم کی ناقص کپتانی پر انہیں تنقید کا نشانہ بنایا تھا۔

ان کا کہنا تھا کہ میرے خیال میں ہوم سائیڈ کا ایک مربوط منصوبہ تھا لیکن بابر اعظم صرف پلان اے کے ساتھ گئے۔

انہوں نے کہا تھا کہ ’بابر اعظم کا پلان ایک ہی تھا کہ پچ اسپن کرے گی لہذا نعمان علی اور ابرار احمد دو اہم بولر ہوں گے جو مخالف ٹیم کو آؤٹ کریں گے لیکن جب پچ زیادہ اسپن نہیں ہوئی تو ان کے پاس کوئی دوسرا پلان ہی نہیں تھا‘۔

انہوں نے مزید کہا تھا کہ بابر اعظم نے سلمان علی آغا سے بولنگ ہی نہیں کروائی، پاکستانی کپتان قدامت پسند دکھائی دیتے ہیں اور انہوں نے کھیل کے نازک اوقات میں بھی ایک ہی حکمت عملی استعمال کی۔