پاکستان فٹ بال فیڈریشن نارملائزیشن کمیٹی کے چیئرمین ہارون ملک کا کہنا ہے کہ جون 2023 تک بھی پی ایف ایف کے انتخابات ہونا ممکن نظر نہیں آرہا ہے ۔

پاکستان فٹ بال فیڈریشن نارملائزیشن کمیٹی کے چیئرمین ہارون ملک نے لاہور میں فٹ بال سمٹ کے بعد میڈیا سے گفتگو کرتے ہوئے  کہا کہ یہ پاکستان کا پہلا فٹ بال سمٹ تھا  ۔

ہارون ملک نے کہا کہ سمٹ میں تمام اسٹیک ہولڈرز نے شرکت کی تمام اسٹیک ہولڈرز کو فیفا اے ایف سی وفد نے سنا۔

مزید پڑھیں: پاکستان فٹ بال فیڈریشن کے زیراہتمام13 ویں پاکستان پریمیئرفٹ بال لیگ

انہوں نے کہا کہ ہم سمجھتے ہیں کہ نارملائزیشن کمیٹی کی پروگریس اچھی جا رہی ہے۔ فیفا اے ایف سی وفد بھی نارملائزیشن کمیٹی کے کام سے مطمئن ہے لیکن میں سمجھتا ہوں کہ جون 2023 تک بھی انتخابات ہوتے ممکن نظر نہیں آ رہے۔

چیئرمین پی ایف ایف نارملائزیشن کمیٹی نے کہا کہ جو کام 74 برس میں نہیں ہو سکے انہیں کرنے میں تو وقت لگے گا۔

ہارون ملک کا کہنا تھا کہ انتخابات میں تاخیر نہیں کی جارہی، شفافیت کے لیے کام مکمل کیے جا رہے ہیں۔ کلبوں کی رجسٹریشن کا کام مکمل کیا جا رہا ہے۔

مزید پڑھیں: پاکستان فٹبال فیڈریشن کا ہیڈ آفس سرکاری دفتر میں تبدیل

انہوں نے مزید کہا کہ جو لوگ کہتے ہیں کہ جان بوجھ کر انتخابات نہیں کرائے جا رہے ان سے کہوں گا کہ کورٹ واپس لے لیں تو ہم اچھے انداز میں الیکشنز کی طرف بڑھ جائیں گے۔

چیئرمین پی ایف ایف نارملائزیشن کمیٹی نے کہا کہ فیفا اے ایف سی وفد کو تمام تر صورتحال سمجھانے کی کوشش کی ہے۔ وفد تمام تفصیلات کے بعد اپنی رپورٹ مرتب کرے گا جس کے بعد فیفا ہی  نارملائزیشن کمیٹی کی مدت بڑھانے کا فیصلہ کرے گی۔