شعیب ملک اور عماد وسیم نے پشاور زلمی کے خلاف میچ میں اہم ریکارڈ اپنے نام کرلیا ہے۔

پاکستان سپر لیگ (پی ایس ایل) سیزن 8 کا آغاز ہوگیا ہے جس میں گزشتہ روز کراچی کنگز کا مقابلہ پشاور زلمی سے ہوا۔

عماد وسیم کی قیادت میں کراچی کنگز نے ٹاس جیت کر فیلڈنگ کرنے کا فیصلہ کیا جو درست فیصلہ ثابت نہ ہوسکا کیونکہ پشاور زلمی نے پہلی اننگز میں 199 رنز جڑ دیے۔

پہلی بار پشاور زلمی کی قیادت کرنے والے بابر اعظم نے 46 گیندوں پر 68 رنز بنائے جس میں 7 چوکے اور 1 چھکا شامل تھا۔

اسٹار پرفارمر ٹاپ کوہلر کیڈمور نے 50 گیندوں پر 92 رنز کی جارحانہ اننگز کھیلی جس میں ان کے 7 چوکے اور 6 چھکے شامل تھے۔

جواب میں کراچی کنگز کی ابتدا خراب رہی، اوپنر شرجیل خان گولڈن ڈک پر واپس پویلین لوٹ گئے جب کہ میتھیو ویڈ نے شاندار آغاز فراہم کرنے کی کوشش کی لیکن بعد میں وہ بھی جمی نیشم کی گیند پر آؤٹ ہوگئے۔

ایک موقع پر میچ کافی حد تک پشاور زلمی کے حق میں چلا گیا لیکن پھر کراچی کنگز نے میچ میں شاندار واپسی کی، کپتان عماد وسیم اور شعیب ملک نے ایک زبردست شراکت داری قائم کی جس نے کافی حد تک میچ کو بدل دیا۔

عماد وسیم نے 47 گیندوں پر 80 رنز اسکور کیے جس میں 7 چوکے اور 4 زبردست چھکے شامل تھے جب کہ شعیب ملک نے بھی ایک اہم اننگز کھیلی۔

انہوں نے 34 گیندوں پر 52 رنز بنائے جس میں 4 چوکے اور دو چھکے شامل تھے جب کہ پشاور زلمی نے میچ بہت اچھا ختم کیا اور 2 رنز سے کامیابی اپنے نام کی۔

عماد وسیم اور شعیب ملک کی جوڑی پی ایس ایل کی تاریخ میں پانچویں وکٹ پر سب سے زیادہ شراکت کا ریکارڈ بنانے والی جوڑی بن گئی ہے۔

شعیب اور عماد نے 131 رنز کی شراکت قائم کی جب کہ اس سے قبل اے بی ڈی ویلیئرز اور ڈیوڈ ویز نے 2019 میں 96 رنز کی شراکت قائم کی تھی۔

علاوہ ازیں 2017 میں کیون پیٹرسن اور سرفراز احمد نے 101 رنز کی شراکت قائم کی تھی۔