پاکستان کرکٹ بورڈ (پی سی بی) نے پی ایس ایل 8 کی نئی ڈیزائن کردہ ٹرافی کی رونمائی لاہور میں کردی ہے۔

پاکستان سپر لیگ (پی ایس ایل) 8 کی ٹرافی کا اسٹار 24 قیراط سونے سے تیار کیا گیا ہے جب کہ ٹرافی کی رونمائی لاہور کے تاریخی شالیمار باغ میں کی گئی ہے۔

پاکستان کرکٹ بورڈ (پی سی بی) کی مینجمنٹ کمیٹی کے چیئرمین نجم سیٹھی نے ٹرافی کی رونمائی کی جب کہ اس موقع پر مینجمنٹ کمیٹی کے اراکین اور فرنچائزز کے نمائندے بھی موجود تھے۔

ٹرافی کے تین ستون 9 ہزار 907 زرقون پتھروں سے جڑے ہوئے ہیں جو قومی کرکٹ ٹیم کے نصب العین اتحاد، جذبہ اور طاقت کی نمائندگی کرتے ہیں۔

ٹرافی کا پچھلا مرکزی ستون مزید کرسٹل سے مزین ہے جو قومی ٹیم کی کامیابی کو یقینی بنانے کے لیے لگن اور محنت کی نمائندگی کرتا ہے۔

پی ایس ایل 8 کی ٹرافی کی رونمائی کردی گئی

اس موقع پر مینجمنٹ کمیٹی کے چیئرمین نجم سیٹھی کا کہنا تھا کہ ’پی ایس ایل میرے دل کے بہت قریب ہے، ہمیشہ سے میرا عزم اور کوشش رہی ہے کہ اسے ہر سال بڑا، بہتر اور مضبوط بنایا جائے‘۔

نجم سیٹھی کہتے ہیں کہ ’گھریلو شائقین کے سامنے پی سی بی کے اہم ایونٹ کو منانے کے لیے ہم نے ایک نئی ٹرافی ڈیزائن کرنے کا فیصلہ کیا جو ایک قابل فخر قوم کے طور پر ہمارے جذبے کو سمیٹتا ہے جب کہ ہم نے اسے شالیمار گارڈنز میں لانچ کرنے کا فیصلہ کیا جو ایک قومی خزانہ اور ہم سب کے لیے فخر کی علامت ہے‘۔

انہوں نے کہا کہ ’یہ ٹرافی پاکستانی عوام کے جذبے اور استقامت کا ثبوت ہے اور آنے والی نسلوں کے کھلاڑیوں کے لیے تحریک کا ذریعہ ہے‘۔

انہوں نے مزید کہا کہ اس ٹرافی کی تخلیق محبت کی ایک حقیقی محنت تھی اور جیسا کہ لیگ کامیابی کے ساتھ بڑھ رہی ہے، پی ایس ایل کی ٹرافی عمدگی اور کامیابی کی علامت بن گئی ہے جسے ہر کھلاڑی اور ٹیم جیتنے کی کوشش کریں گے۔

واضح رہے کہ 13 فروری سے پی اس ایل 8 کا آغاز ہونے جارہا ہے جس کی افتتاحی تقریب ملتان میں منعقد ہوگی جب کہ ایونٹ کے میچز 19 مارچ تک کراچی، ملتان، راولپنڈی اور لاہور میں کھیلے جائیں گے۔