محمد رضوان نے انکشاف کیا ہے کہ انہوں نے نیوزی لینڈ کے خلاف سیریز میں خود بابر اعظم سے کہا تھا کہ مجھے ڈراپ کرکے سرفراز احمد کو کھلایا جائے۔

پاکستان کرکٹ ٹیم کے وکٹ کیپر و بیٹر محمد رضوان نے انکشاف کیا ہے کہ انہوں نے خود ٹیم انتظامیہ سے کہا تھا کہ نیوزی لینڈ کے خلاف ہوم ٹیسٹ سیریز میں انہیں ڈراپ کریں اور ان کی جگہ سابق کپتان سرفراز احمد کو کھلائیں۔

کرکٹ ویب سائٹ کو خصوصی انٹرویو دیتے ہوئے محمد رضوان کا کہنا تھا کہ وہ انگلینڈ کے خلاف ہوم ٹیسٹ سیریز میں اپنی کارکردگی سے مایوس تھے جس کی وجہ سے وہ خود کو پلیئنگ الیون کا مستحق نہیں سمجھتے تھے۔

واضح رہے کہ پاکستان کو انگلینڈ کے خلاف ہوم ٹیسٹ سیریز میں وائٹ واش کا سامنا کرنا پڑا تھا، محمد رضوان نے تین میچوں کی چھ اننگز میں 23.50 کی اوسط سے صرف 141 رنز ہی اسکور کیے تھے جب کہ وہ ایک بھی نصف سنچری اسکور کرنے میں ناکام رہے تھے۔

محمد رضوان نے اپنی بات کو جاری رکھتے ہوئے کہا کہ ’آپ ہیڈ کوچ ثقلین مشتاق سے پوچھ سکتے ہیں کہ میں نے انگلینڈ کے خلاف سیریز کے بعد ان سے کیا کہا تھا‘۔

انہوں نے کہا کہ مجھے سرفراز احمد کی کارکردگی دیکھ کر خوشی ہوئی کیونکہ میں یہی چاہتا تھا، میں نے ذاتی طور پر سوچا تھا کہ چونکہ میں پرفارم نہیں کر پا رہا تھا اس لیے میں اگلی سیریز میں کھیلنے کا حقدار نہیں۔

ان کا کہنا تھا کہ مجھے کئی کھلاڑیوں نے کہا کہ ہر کھلاڑی اس مرحلے سے گزرتا ہے اور آپ چند ناکامیوں کی بنیاد پر بینچ پر نہیں بیٹھ سکتے۔

انہوں نے مزید کہا کہ ’سرفراز احمد اپنی ڈومیسٹک پرفارمنس کی بنیاد پر ٹیم میں جگہ کے مستحق تھے۔ اس لیے سرفراز کو پرفارم کرتے ہوئے دیکھ کر مجھے خوشی ہوئی اور جو بھی پاکستان کے لیے بہترین کارکردگی کا مظاہرہ کرتا ہے وہ کھیلنے کا مستحق ہے۔

خیال رہے کہ سرفراز احمد نے دو ٹیسٹ میچز میں 83.75 کی ناقابل یقین اوسط سے 335 رنز اسکور کیے جس کے بعد وہ نیوزی لینڈ کے خلاف سیریز میں سب سے زیادہ رنز بنانے والے کھلاڑی قرار پائے تھے۔