سابق کرکٹر ثقلین مشتاق کا کہنا ہے کہ شاداب خان کے پانچ وقت کے نمازی ہونے کی وجہ سے بیٹی کا رشتہ دیا ہے۔

حال ہی میں سابق کرکٹر ثقلین مشتاق نے نادرعلی کے پوڈ کاسٹ میں شرکت کی جہاں میزبان کی جانب سے سوال کیا گیا کہ شاداب خان میں ایسا کیا دیکھا کہ بیٹی کا رشتہ دیدیا اور رشتہ بھیجا کس نے تھا؟

یہ بھی پڑھیں: بابر اعظم نے شاداب خان کو شادی پر کتنی سلامی دی؟ ویڈیو وائرل

سوال کے جواب میں سابق کرکٹر ثقلین مشتاق کا کہنا تھا کہ شاداب کے والدین رشتہ لے کر آئے تھے، شاداب کی والدہ نے کہا کہ ہمارے بیٹے نے لڑکی پسند کرنے کی ذمہ داری ہمیں دی ہے اور ہم آپ کے پاس آئے ہیں۔

  ثقلین مشتاق نے بتایا کہ شاداب خان کی والدہ نے کہا کہ بیٹی بادشاہ کی ہو یا فقیر کی ایک روز اس کی شادی ہونی ہوتی ہے، میں آج اس وقت تک آپ کے گھر سے نہیں جاؤں گی جب تک آپ ہاں نہیں کر دیتے۔

 سابق کرکٹر نے کہا کہ شاداب کی والدہ کی بات سن کر میں نے ان سے کہا کہ آپ استخارہ کر لیں اور میں بھی استخارہ کر لیتا ہوں۔

انہوں نے کہا کہ پھر ہم نے دو دن کا وقت مانگا اور اس کے بعد بیٹی کا نکاح کر دیا اور نکاح میں نے خود پڑھایا تھا، میں بیان نہیں کر سکتا کہ کتنا اچھا محسوس ہوتا ہے جب آپ بیٹی کا نکاح خود پڑھاتے ہیں۔

 ثقلین مشتاق نے کہا کہ مجھے شاداب خان کی یہ عادت بہت پسند ہے کہ وہ پانچ وقت کی نماز پڑھتے ہیں اور جب ہم ہوٹل میں بھی ہوتے ہیں میچ کے دوران تو وہ کمرے کا دروازہ بجا کر بلاتے ہیں کہ آؤ نماز پڑھیں۔

یہ بھی پڑھیں: شاداب خان کی مہندی کی ویڈیو سوشل میڈیا پر وائرل

انہوں نے کہا کہ اس سب کے علاوہ مجھے ایک اور بات نے متاثر کیا اور وہ یہ کہ آج کل کے دور میں بھی انہوں نے لڑکی پسند کرنے کا اختیار اپنے والدین کو دیا۔