بھارتی کھلاڑی سوریا کمار یادیو کے ساتھ موازنہ کرنے پر محمد حارث نے کھل کر بیان کردیا ہے۔

محمد حارث اس وقت سری لنکا میں ہونے والے اے سی سی ایمرجنگ ایشیا کپ میں پاکستان شاہینز کی قیادت کررہے ہیں جب کہ ان کی قیادت میں قومی ٹیم اب تک اپنے دونوں میچز جیت چکی ہے اور ان کا اگلا میچ آج بھارت کے خلاف کھیلا جارہا ہے۔

قدرے غیر روایتی شاٹ سلیکشن کی وجہ سے محمد حارث کا موازنہ بھارتی کھلاڑی سوریا کمار یادیو کے ساتھ کیا جاتا ہے تاہم قومی کھلاڑی 360 ڈگری کرکٹر کے طور پر اپنا نام بنانا چاہتے ہیں۔

حال ہی میں ایک مقامی یوٹیوب چینل کو انٹرویو دیتے ہوئے پاکستان شاہینز کے کپتان محمد حارث کا کہنا تھا کہ ’’ہمیں ابھی دونوں کے درمیان موازنہ نہیں کرنا چاہیے، سوریا کی عمر 32، 33 سال ہے جب کہ میں ابھی صرف 22 سال کا لڑکا ہوں‘‘۔

انہوں نے کہا کہ اس مرحلے تک پہنچنے کے لیے مجھے ابھی بھی مزید کام کرنا ہے، سوریا کا اپنا لیول ہے جب کہ ڈی ویلیئرز اپنا لیول رکھتے ہیں اور میرا اپنا لیول ٹھیک ہے۔

انہوں نے خواہش کا اظہار کرتے ہوئے کہا کہ ’’میں ایک 360 ڈگری کرکٹر کے طور پر اپنا نام بنانا چاہتا ہوں جب کہ میں انہیں استعمال نہیں کرنا چاہتا‘‘۔

انہوں نے مزید کہا کہ تمام ٹیمیں ہمارے لیے ایک جیسی ہیں اور ہم یہاں ٹورنامنٹ کھیلنے آٗئے ہیں، صرف بھارت سے کھیلنے نہیں آٗئے۔ ہم بھارت کے خلاف بھی اسی طرح کھیلیں گے جیسے ہم نے دوسری ٹیموں کے خلاف کھیلا۔

واضح رہے کہ بھارت اور پاکستان دونوں نے اپنے پہلے دو میچز جیت لیے ہیں جب کہ آج کا میچ گروپ کے فاتح کا فیصلہ کرے گا۔