انٹرنیشنل کرکٹ کونسل (آئی سی سی) کی جانب سے ون ڈے رینکنگ جاری کردی گئی ہے۔

آئی سی سی کی جانب سے جاری کردہ ون ڈے بیٹرز کی رینکنگ میں پاکستان ٹیم کے کپتان بابر اعظم کی پہلی پوزیشن برقرار ہے۔

پاکستان کے فخر زمان کی تیسری اور امام الحق کی چوتھی پوزیشن بھی برقرار ہے جب کہ بولرز میں آسٹریلیا کے جوش ہیزل ووڈ پہلے نمبر پر موجود ہیں۔

ون ڈے آل راؤنڈرز ریکنگ میں بنگلا دیش کے شکیب الحسن کا پہلا نمبر برقرار ہے۔

یہ بھی پڑھیں: آئی سی سی ٹیسٹ رینکنگ جاری، بابر اعظم تنزلی کے شکار

دوسری جانب آئی سی سی نے ٹیسٹ پلیئرز رینکنگ بھی جاری کی ہے جس میں نیوزی لینڈ کے کین ولیمسن بدستور پہلی پوزیشن پر برقرار ہیں۔

آسٹریلیا کے ٹریوس ہیڈ دو درجے ترقی کے بعد دوسرے نمبر پر آگئے جب کہ بابر اعظم تین درجے ترقی کے بعد تیسرے نمبر پر آگئے ہیں۔ آسٹریلیا کے اسٹیو اسمتھ دو درجے تنزلی کے بعد چوتھے نمبر پر آگئے۔

مارنوس لابوشین دو اور جوئے روٹ ایک درجے تنزلی کے بعد پانچویں اور چھٹے نمبر پر آگئے، ہیری بروک ایک درجے ترقی کے بعد 12 ویں نمبر پر آگئے جب کہ انگلینڈ کے کپتان بین اسٹوکس کی رینکنگ میں پانچ درجے بہتری آئی ہے اور وہ 18 ویں نمبر پر آگئے ہیں۔

ٹیسٹ بولرز کی رینکنگ میں بھارت کے روی چندرن ایشون کی پہلی پوزیشن برقرار ہے، آسٹریلیا کے کپتان پیٹ کمنز دوسرے نمبر پر موجود ہیں جب کہ پاکستان کے شاہین شاہ آفریدی ایک درجے ترقی کے بعد پانچویں نمبر پر آگئے ہیں۔

انگلینڈ کے اسٹیورٹ براڈ چار درجے ترقی کے بعد چھٹے نمبر پر آگئے ہیں، مچل اسٹارک کی رینکنگ میں تین درجے ترقی ہوئی اور وہ 11ویں نمبر پر پہنچ گئے جب کہ ٹیسٹ آل راؤنڈرز کی رینکنگ میں بھارت کے رویندرا جڈیجا کا پہلا نمبر برقرار ہے۔