چیئرمین پی سی بی ذکاء اشرف کہتے ہیں کہ میری خواہش تھی کہ اختلافات نہیں ہونے چاہئیے اور ہم نجم سیٹھی کو باعزت طریقے سے الوداع کرنا چاہتے تھے۔

چیئرمین پی سی بی ذکاء اشرف کی زیرصدارت پی سی بی مینجمنٹ کمیٹی کا پہلا اجلاس ہوا، نیشنل کرکٹ اکیڈمی آمد پر ڈائریکٹر نیشنل کرکٹ اکیڈمی ذاکر خان نے ذکاء اشرف کا استقبال کیا۔

نیشنل کرکٹ اکیڈمی پہنچنے پر ملازمین نے بھی ذکاء اشرف کا بھرپور استقبال کیا جب کہ مینجمنٹ کمیٹی کے تمام ممبران نے متفقہ طور پر ذکاء اشرف پر بھرپور اعتماد کا اظہار کیا۔

ممبران مینجمنٹ کمیٹی کا کہنا ہے کہ ذکاء اشرف کے ساتھ مل کر کرکٹ کی بہتری کے لئے کام کریں گے، ذکاء اشرف کی چیئرمین مینجمنٹ کمیٹی تعیناتی کرکٹ کے لئے بہتر فیصلہ ثابت ہوگا۔

چیف فنانس آفیسر نے پی سی بی کے بجٹ، اسٹیڈیمز کی تعمیرنو، ڈومیسٹک کھلاڑیوں کے سینٹرل کنٹریکٹ سمیت اہم امور پر مینجمنٹ کمیٹی کو بریفنگ دی۔

چوہدری ذکاء اشرف کا میجمنٹ کمیٹی کے اجلاس سے خطاب میں کہنا تھا کہ پیٹرن ان چیف وزیر اعظم شہباز شریف اور آصف زرداری کا شکر گزار ہوں۔ ان کے اعتماد پر پورا اترنے کی کوشش کروں گا۔

ذکاء اشرف نے کہا کہ میری خواہش تھی کہ اختلافات نہیں ہونے چاہئیے، ہم نے متحد ہوکر کرکٹ کی بہتری کے لئے کام کرنا ہے۔

انہوں نے کہا کہ ہم چاہتے تھے نجم سیٹھی کو باعزت طریقے سے الوداع کرتے، ہم نے نجم سیٹھی کو بھی پیغام بھجوایا تھا جب کہ اعجاز بٹ کو ابھی اچھی طرح سے رخصت کیا۔

ان کا کہنا تھا کہ ہم نے سب مل کر پاکستان کرکٹ کی بہتری کے لئے کام کرنا ہے، ایشیاء کپ اور ورلڈکپ سمیت بہت سے معاملات میں بہتری کی ضرورت ہے۔ ہم اپنی پوری توجہ کرکٹ اور کرکٹرز کی بہتری پر مرکوز رکھیں گے۔

یہ بھی پڑھیں: وزیر اعظم شہباز شریف سے ذکاء اشرف کی ملاقات

ذکاء اشرف کہتے ہیں کہ بین الاقوامی محاذ پر بہت سارے چیلنجز کا سامنا ہے، بین الاقوامی ایونٹس میں پاکستان کرکٹ کو اس کا جائز حق دلوائیں گے۔ میں تمام ممبران کو ویلکم کرتا ہوں آپ سب میرے ساتھی ہیں۔

ذکاء اشرف نے بورڈ کے معاملات میں شفافیت لانے کی سخت ہدایت کی اور کہا کہ ریجنز سمیت ایسوسی ایشنز کے انتخابات میں دھاندلی کی شکایات کا ازالہ کیا جائے گا اور صاف شفاف انتخابات کا انعقاد یقینی بنایا جائے۔

ذکاء اشرف نے سلمان نصیر کو ہدایت کرتے ہوئے کہا کہ وزارت بین الصوبائی رابطہ آڈٹ کے لئے جو چیزیں مانگ رہی ہیں اس کو فراہم کی جائیں۔

انہوں نے مزید کہا کہ ڈومیسٹک کرکٹ میں کھلاڑیوں کو اچھی سہولیات دیں گے تو اچھے کرکٹر سامنے آئیں گے۔ ایبٹ آباد، میرپور اور حیدرآباد اسٹیڈیم کو بہتر بنایا جائے گا اور اسٹیڈیمز میں ہاسپیٹیلٹیز باکسز کو اپ گریڈ کریں گے۔