چیف سلیکٹر وہاب ریاض نے نیوزی لینڈ کے خلاف ٹی ٹوئنٹی سیریز میں اعظم خان کو منتخب کرنے اور محمد حارث کو آرام دینے کی وجہ بتادی۔

پاکستان کرکٹ ٹیم کے چیف سلیکٹر وہاب ریاض نے نیوزی لینڈ کے خلاف 12 جنوری سے آکلینڈ میں شروع ہونے والی پانچ میچوں کی ٹی ٹوئنٹی سیریز کے لیے 17 رکنی اسکواڈ کا اعلان کردیا ہے۔

لاہور میں پریس کانفرنس کرتے ہوئے وہاب ریاض نے اعظم خان کے انتخاب کے حوالے سے سلیکشن کمیٹی کی فیصلہ سازی پر کھل کر وضاحت پیش کی۔

یہ بھی پڑھیں: نیوزی لینڈ کیخلاف ٹی ٹوئنٹی سیریز کیلئے پاکستانی اسکواڈ کا اعلان

ان کا کہنا تھا ’’ہم نے اعظم خان سے بات کی ہے اور انہیں واضح پیغام دے دیا ہے کہ ہم انہیں موقع دینا چاہتے ہیں لیکن انہیں بھی اپنی پرفارمنس سے جواب دینا ہوگا‘‘۔

چیف سلیکٹر کہتے ہیں ’’آپ کسی سے بھی 10 دنوں میں 10 کلو وزن کم کرنے کی توقع نہیں کرسکتے لیکن فٹنس کو بہتر بنانے کا ایک طریقہ ہے‘‘۔

وہاب ریاض نے کہا ’’پی ایس ایل، ڈومیسٹک کرکٹ اور دیگر لیگز میں ہم نے بہت زیادہ کھلاڑیوں کو اس نمبر پر آزمایا لیکن اب ہم اعظم خان کو موقع دینا چاہتے ہیں‘‘۔

علاوہ ازیں وہاب ریاض نے یہ بھی کہا کہ محمد حارث کو اس سیریز میں اسٹریجک طور پر آرام دینے کا فیصلہ کیا گیا ہے لیکن مستقبل میں ان کی ضرورت پڑے گی۔

یہ بھی پڑھیں: دورہ نیوزی لینڈ: بابر اعظم اور محمد رضوان کو آرام دینے پر غور

انہوں نے مزید کہا کہ فرسٹ کلاس کرکٹ میں کچھ ڈومیسٹک پرفارمرز تھے جنہیں ہم موقع دینا چاہتے تھے اور اپنے کھلاڑیوں کے پول کو بڑھانا چاہتے تھے لہذا اس لیے ہم نے محمد حارث کو اس دورے کے لیے آرام دینے کا فیصلہ کیا۔

دورہ نیوزی لینڈ کے لیے پاکستانی اسکواڈ:

شاہین شاہ آفریدی(کپتان)، عامر جمال، عباس آفریدی، ابرار احمد، اعظم خان، بابر اعظم، فخر زمان، حارث رؤف، حسیب اللہ، افتخار احمد، محمد نواز، محمد رضوان، محمد وسیم جونیئر، صاحبزادہ فرحان، صائم ایوب، اسامہ میر اور زمان خان۔