پاکستان کے سابق کرکٹر مدثر نذر نے سابق ٹیسٹ کپتان بابر اعظم کی کارکردگی اور شان مسعود کی کپتانی پر اپنے خیالات کا اظہار کیا ہے۔

خبر رساں ادارے سے گفتگو میں سابق کرکٹر مدثر نظر نے کھیل کے مختلف فارمیٹس میں بابر اعظم کی کارکردگی پر روشنی ڈالتے ہوئے ٹیسٹ کرکٹ میں ان کی بلے بازی میں فرق کی نشاندہی کی۔

انہوں نے کہا ’’ٹیسٹ کرکٹ میں بابر اعظم کی کارکردگی ون ڈے اور ٹی ٹوئنٹی سے بالکل مختلف ہے، اگرچہ وہ ایک بہترین بلے باز ہیں لیکن ٹیسٹ کرکٹ میں وہ تھوڑا سا پیچھے جاکر کھیلتے ہیں‘‘۔

ان کا کہنا تھا ’’پرتھ ٹیسٹ میں بابر نے جن دو گیندوں کا سامنا کیا اس پر کوئی بھی بلے باز آؤٹ ہوسکتا تھا جب کہ پرتھ میں جس طرح کی پچ تیار کی گئی تھی اس پر کوئی بھی کبھی بھی آؤٹ ہوسکتا ہے‘‘۔

مدثر نظر نے شان مسعود کے بطور ٹیسٹ کپتان تقرری پر تحفظات کا اظہار کرتے ہوئے کہا ’’بطور کپتان شان مسعود سے متعلق کوئی رائے قائم نہیں کی لیکن میں اس خیال کے خلاف ہوں کہ کسی کو صرف اس لیے کپتان بنا دیا جائے کہ وہ انگریزی جانتا ہو، ایسا کرنا درست نہیں‘‘۔

سابق کرکٹر نے کہا ’’شان مسعود ایک اچھا کھلاڑی ہے، اگر وہ ٹیم میں مسلسل کارکردگی کا مظاہرہ کررہا ہوتا اور پھر اسے کپتان بنادیا جاتا تو اچھا ہوتا‘‘۔

ان کا کہنا تھا ’’کافی عرصے سے شان مسعود کو ٹیم میں شامل کرنے کی کوششیں کی جارہی تھی اب انہیں کپتان بنادیا گیا ہے، یہ سب نجم سیٹھی کے دور میں شروع ہوا تھا اور اب ذکاء اشرف کے دور میں بھی ایسا ہی ہورہا ہے‘‘۔

انہوں نے مزید کہا ’’بیچارہ وہ کیا کرسکتا ہے کیونکہ اسے اتنے چیلنجنگ ٹور میں کپتان بنایا گیا ہے جب کہ ٹیم میں اس کی جگہ بھی نہیں بنتی تھی‘‘۔