پاکستان کرکٹ بورڈ نے ٹی ٹوئنٹی انٹرنیشنل سیریز کے کیمپ کے لیے میڈیا ایڈوائزری جاری کردی۔

پاکستان میں کھلاڑیوں کے لیے نیوزی لینڈ روانگی سے قبل کیمپ کل سے قذافی اسٹیڈیم لاہور میں شروع ہوگا، کیمپ 29 دسمبر سے 3 جنوری تک جاری رہے گا۔

ٹیم بدھ 3 جنوری کی شام لاہور سے دبئی کے راستے آکلینڈ کے لیے روانہ ہوگی جب کہ کیمپ میں عباس آفریدی، اعظم خان، فخر زمان، حسیب اللہ خان، افتخار احمد اور صاحبزادہ فرحان شرکت کریں گے۔

پاکستان کرکٹ بورڈ نے کیمپ میں نو اضافی کھلاڑیوں کو بھی مدعو کیا ہے جن میں احمد شہزاد، عارف یعقوب، کامران غلام، محمد عامر خان، محمد حارث، محمد عمران، عمیر بن یوسف، سجاد علی جونیئر اور شہاب خان شامل ہیں۔

یہ اضافی کھلاڑی چار دن تک کیمپ کا حصہ ہوں گے اور یکم جنوری کو ٹریننگ کے بعد جاری پریذیڈنٹ ٹرافی گریڈ I میں حصہ لینے کے لیے منتشر ہوجائیں گے۔

کیمپ کا شیڈول (قذافی اسٹیڈیم میں تمام سرگرمیاں):

29 دسمبر کو کھلاڑی دوپہر 12 بجے سے 2:30 بجے تک ٹریننگ کریں گے جس کے بعد ایک کھلاڑی میڈیا سے بات چیت کے لیے دستیاب ہوگا۔

30 دسمبر سے 2 جنوری تک کھلاڑی دوپہر 12 بجے سے 2:30 بجے تک ٹریننگ کریں گے جس کے بعد میڈیا کو سیشن کی کوریج کے لیے مدعو کیا جائے گا۔

3 جنوری کو کھلاڑی دوپہر 12 بجے سے 2:30 بجے تک ٹریننگ کریں گے جس کے بعد کیمپ کمانڈنٹ یاسر عرفات میڈیا سے بات چیت کے لیے دستیاب ہوں گے۔

نیوزی لینڈ سیریز کے لیے پاکستانی اسکواڈ:

شاہین شاہ آفریدی (کپتان)، عامر جمال، عباس آفریدی، اعظم خان (وکٹ کیپر)، ابرار احمد، بابر اعظم، فخر زمان، حارث رؤف، حسیب اللہ (وکٹ کیپر)، افتخار احمد، محمد نواز، محمد رضوان (وکٹ کیپر)، محمد وسیم جونیئر، صاحبزادہ فرحان، صائم ایوب، اسامہ میر اور زمان خان۔