پاکستان کے مایہ ناز بیٹر فخر زمان نے نیوزی لینڈ کی خلاف ٹی ٹوئنٹی سیریز میں اپنا بیٹنگ نمبر بتادیا۔

پاکستان کرکٹ ٹیم کے جارح مزاج بلے باز فخر زمان نے نیوزی لینڈ کے خلاف 12 جنوری سے آکلینڈ میں شروع ہونے والی پانچ میچوں کی ٹی ٹوئنٹی سیریز کے لیے اپنے بیٹنگ نمبر میں تبدیلی کا انکشاف کیا ہے۔

لاہور میں میڈیا سے گفتگو کرتے ہوئے انہوں نے انکشاف کیا کہ کوچ اور کپتان نے انہیں تیسرے یا چوتھے نمبر پر بیٹنگ کرنے کی ہدایت کی ہے جوکہ بطور اوپنر ان کے معمول کے کردار سے الگ ہے۔

انہوں نے کہا ’’کسی بھی ٹیم کے لیے مقابلہ ضروری ہے اور یہ اچھی بات ہے کہ ٹیم میں ایک جگہ کے لیے چھ کھلاڑی موجود ہیں‘‘۔

ان کا کہنا تھا ’’میں نے ہمیشہ ٹیم کے لیے اوپننگ کی ہے لیکن حالات کے مطابق مجھے تیسرے یا چوتھے نمبر پر کھیلنے کی ہدایت کی گئی ہے‘‘۔

فخر زمان کہتے ہیں ’’جیسا کہ آپ سب جانتے ہیں کہ بابر اعظم اور محمد رضوان کی ٹیم کے لیے اوپننگ کرتے آرہے ہیں اور انہوں نے اچھی کارکردگی کا بھی مظاہرہ کیا ہے‘‘۔

انہوں نے مزید کہا ’’کوچ اور کپتان نے مجھے ایک یا دو نمبر نیچے کھیلنے کا حکم دیا ہے اور میں اس سے خوش ہوں‘‘۔

خیال رہے کہ پاکستان اور نیوزی لینڈ کے درمیان ٹی ٹوئنٹی سیریز کا پہلا میچ 12 جنوری کو آکلینڈ میں کھیلا جائے گا جب کہ دوسرا میچ 14 جنوری کو ہیملٹن میں ہوگا۔

تیسرا میچ 17 جنوری کو ڈونیڈن، چوتھا میچ 19 جنوری کو کرائسٹ چرچ جب کہ پانچواں و آخری میچ بھی 21 جنوری کو کرائسٹ چرچ میں ہی کھیلا جانا ہے۔

دورہ نیوزی لینڈ کے لیے پاکستانی اسکواڈ:

شاہین آفریدی (کپتان)، بابر اعظم، محمد رضوان (وکٹ کیپر)، فخر زمان، صائم ایوب، صاحبزادہ فرحان، حسیب اللہ خان، افتخار احمد، اعظم خان، عامر جمال، عباس آفریدی، محمد وسیم جونیئر، محمد نواز، ابرار احمد، اسامہ میر، حارث رؤف اور زمان خان۔