پاکستان کرکٹ بورڈ کے چیئرمین محسن نقوی نے پاکستان کے تینوں بڑے اسٹیڈیمز کے تیار کردہ ڈیزائن پر اطمینان کا اظہار کیا ہے

چیئرمین پاکستان کرکٹ بورڈ محسن نقوی نے برطانیہ کا دورہ کیا اور لندن میں انٹرنیشنل اسٹیڈیمز ڈیزائن کرنے والی دنیا کی معروف کمپنی بی ڈی پی پیٹرن کے ہیڈ آفس پہنچے۔

بی ڈی پی کے چیئرمین کرس ہارڈنگ نے چیئرمین پی سی بی محسن نقوی کا خیر مقدم کیا جب کہ محسن نقوی نے بی ڈی پی پیٹرن کے چئیرمین، اسپورٹس ڈویژن کے سربراہ، ڈیزائن ڈائریکٹر سمیت انجینئرنگ و آرکیٹیکٹ حکام سے ملاقات کی۔

پاکستان کے ہائی کمشنر ڈاکٹر محمد فیصل، چیف آپریٹنگ آفیسر پی سی بی سلمان نصیر، بی ڈی پی پیٹرن کے اسپورٹس ڈویژن کے سربراہ ڈیپش پٹیل، ڈیزائن ڈائریکٹر جان سکاوٹ کوہلی، سینئر آرکیٹیکٹ انٹوینو ٹینزریلا، لیڈ پراجیکٹ ڈیزائنز ماریہ بوسورا، ڈینینل گولڈن برگ اور ڈوویلی بویلرائٹ بھی اس موقع پرموجود تھے۔

علاوہ ازیں اس موقع پر قذافی سٹیڈیم لاہور، نیشنل بینک اسٹیڈیم کراچی اور راولپنڈی اسٹیڈیم کے ڈیزائن کی حتمی منظوری دی گئی، تینوں اسٹیڈیمز کو بین الاقوامی معیار کے مطابق اپ گریڈ کیا جارہا ہے۔

بی ڈی پی حکام نے ڈرائنگز کے ذریعے اسٹیڈیمز کے اپ گریڈیشن پراجیکٹ کے بارے میں تفصیلی بریفنگ دی، چیئرمین پی سی بی محسن نقوی نے تینوں اسٹیڈیمز کے معیاری ڈیزائن پر اطمینان کا اظہار۔

چیئرمین پی سی بی محسن نقوی نے ڈیزائن تیار کرنے والے انجینئرنگ و آرکیٹیکٹ اسٹاف کی کارکردگی کو بھی سراہا۔

محسن نقوی کا کہنا ہے کہ ڈیزین کے مطابق اسٹیڈیمز کے تعمیراتی کاموں کو مقررہ مدت میں مکمل کرنا ایک بڑا ٹاسک ہے، ہماری پوری ٹیم اس چیلنجنگ کام کو دن رات محنت کرکے جلد پایہ تکمیل تک پہنچائے گی۔

چیئرمین پی سی بی کہتے ہیں کہ چیمپئنز ٹرافی سے قبل تینوں اسٹیڈیمز کی اپ گریڈیشن کا کام مکمل کرائیں گے، تاریخ میں پہلی بار اسٹیڈیمز میں اتنے بڑے پیمانے پر شائقین کرکٹ کے لئے سہولتوں کو بہتر بنایا جارہا ہے۔

انہوں نے کہا کہ اس میگا پراجیکٹ کی ذاتی طور پر نگرانی کررہا ہوں، پوری کوشش کریں گے کہ کام کو متعین مدت سے قبل مکمل کیا جائے۔

بریفنگ میں انہیں بتایا گیا کہ تینوں اسٹیڈیمز کے ڈیزائن کو عالمی معیار کے مطابق تیار کیا گیا ہے۔ جب کہ بی ڈی پی پیٹرن کے حکام نے قذافی اسٹیڈیم، نیشنل بینک اسٹیڈیم کراچی اور راولپنڈی اسٹیڈیم کے نئے ڈیزائن سے بھی آگاہ کیا۔

واضح رہے کہ بی ڈی پی کی بنیاد 63 برس قبل رکھی گئی اور یہ کمپنی دنیا کے کئی ممالک میں انٹرنیشنل معیار کے تقریبا 200 چھوٹے بڑے اسٹیڈیمز ڈیزائن کرچکی ہے اور اب تک ایک ہزار سے زائد ڈیزائن کوالٹی ایوارڈز بھی حاصل کرچکی ہے۔