لاہور: پاکستان نے چوتھے بلائنڈ ٹی ٹوئنٹی کرکٹ ورلڈکپ میں سیمی فائنل تک رسائی حاصل کرلی۔

پاکستان نے نیپال کو 10 وکٹوں سے شکست دے کر چوتھے ٹی ٹوئنٹی بلائنڈ کرکٹ ورلڈ کپ کے سیمی فائنل کے لیے کوالیفائی کرلیا ہے۔

نیپال نے پاکستان کے خلاف ٹاس جیت کر پہلے بیٹنگ کرنے کا فیصلہ کیا تاہم پاکسٹان نے 101 رنز کا ہدف 6.4 اوورز میں بغیر کسی نقصان کے مکمل کرلیا۔

پاکستان کی جانب سے اوپنر نعمت اللہ نے 30 گیندوں پر 73 اور محمد صفدر نے 14 گیندوں پر ناقابل شکست 24 رنز بنائے۔

دوسری جانب سری لنکا نے جنوبی افریقہ کو 53 رنز سے شکست دے کر چوتھے بلائنڈ کرکٹ ورلڈ کپ میں اپنی تیسری کامیابی حاصل کرلی ہے۔

 سری لنکا نے پہلے بیٹنگ کرتے ہوئے 20 اوورز میں 6 وکٹوں کے نقصان پر 217 رنز بنائے،  سورنگا سمپت نے 33 گیندوں پر 56 رنز کی اننگز کھیلی موہن راج نے 27 گیندوں پر 32 رنز بنائے۔

ہدف کے تعاقب میں جنوبی افریقہ کی بلائنڈ ٹیم 20 اوورز میں 9 وکٹوں کے نقصان پر 164 رنز ہی بناسکی، تیبوہو فرانسس نے 33 گیندوں پر 30 رنز بنائے جب کہ بھولے بڈلا نے 24 گیندوں پر 29 رنز بنائے۔

سری لنکا کے کپتان چندانہ دیشپریا اور سمن توشارا نے 2، 2 کھلاڑیوں کو أؤٹ کیا۔

مہمان خصوصی قونصل جنرل سری لنکا پنجاب یاسین جویا نے چیئرمین پی بی سی سی سید سلطان شاہ کے ہمراہ سری لنکا کے سورنگا سمپت کو مین أف دی میچ کا ایوارڈ دیا۔