آئی سی سی چیمپئنز ٹرافی کا میلہ کل پاکستان میں سجے گا، جس کے تحت پہلا میچ کراچی میں پاکستان اور نیوزی لینڈ کے درمیان کھیلا جائے گا۔

اس اہم موقع پر صدر آصف علی زرداری مہمان خصوصی ہوں گے، جبکہ پاکستان ائیر فورس شیر دل شو کا شاندار فضائی مظاہرہ بھی پیش کرے گی۔

پاکستان کرکٹ بورڈ (پی سی بی) کے چیئرمین محسن نقوی کی زیر صدارت قذافی سٹیڈیم میں اجلاس منعقد ہوا جس میں چیمپئنز ٹرافی کے انتظامات اور تیاریوں کا تفصیلی جائزہ لیا گیا۔

اجلاس میں محسن نقوی نے کہا کہ پاکستان چیمپئنز ٹرافی ٹورنامنٹ کے لیے پوری طرح تیار ہے اور انہوں نے تمام تر انتظامات کو مزید بہتر بنانے کی ہدایت دی۔

محسن نقوی نے کہا کہ تمام ٹیموں کو بین الاقوامی معیار کی سہولتیں فراہم کی جائیں گی اور سٹیڈیمز میں شائقین کرکٹ کے لیے ہر ممکن سہولتیں دی جائیں گی۔

ان کا کہنا تھا کہ 29 برس بعد آئی سی سی ٹورنامنٹ کا انعقاد پاکستان کے لیے باعث افتخار ہے اور چیمپئنز ٹرافی کا شاندار انعقاد یقینی بنا کر پاکستان کی عزت بڑھائیں گے۔

اجلاس میں پی سی بی کے ایڈوائزر عامر میر، چیف آپریٹنگ آفیسر سمیر احمد، ڈائریکٹر سکیورٹی، ڈائریکٹر انفراسٹرکچر، ڈائریکٹر ایچ آر و ایڈمن، ڈائریکٹر میڈیا اینڈ کمیونیکیشن، ہیڈ آف آئی ٹی، ہیڈ آف ویمنز ڈیپارٹمنٹ اور دیگر متعلقہ حکام نے بھی شرکت کی۔

کل سے شروع ہونے والی چیمپئنز ٹرافی کی اس اہم تقریب میں پاکستان کرکٹ کا شاندار جشن منایا جائے گا، جس سے نہ صرف کھیل کی سطح پر بلکہ عالمی سطح پر بھی پاکستان کی ساکھ میں مزید بہتری آئے گی۔