لاہور: پاکستان کرکٹ بورڈ (پی سی بی) کے چیئرمین محسن نقوی چین سے واپسی کے بعد بغیر آرام کیے علی الصبح قذافی اسٹیڈیم پہنچ گئے اور قذافی اسٹیڈیم کی افتتاحی تقریب کے انتظامات کا جائزہ لیا۔

چیئرمین پی سی بی محسن نقوی نے افتتاحی تقریب کے لئے شاندار انتظامات کی ہدایت کرتے ہوئے کہا کہ ایونٹ کو نئے قذافی اسٹیڈیم کے شایان شان ہونا چاہیے، آج پاکستان کے لئے فخر کا مقام ہے، ریکارڈ مدت میں قذافی سٹیڈیم کی تعمیر نو کا کام مکمل کرنے کا کریڈٹ پوری ٹیم کو جاتا ہے۔

انکا کہنا تھا کہ دنیائے کرکٹ کا خوبصورت ترین و عالمی معیار کا قذافی سٹیڈیم ریکارڈ مدت میں مکمل ہوا ہے، قوم سے کیا وعدہ پورا ہونے پر اللہ تعالٰی کا شکر گزار ہوں۔

محسن نقوی نے مزید کہا کہ شائقین کرکٹ اور کھلاڑی اسٹیڈیم میں فراہم کردہ جدید سہولتوں سے محظوظ ہوں گے، ورکرز، ایف ڈبلیو او، نیسپاک، کنٹریکٹر اور پی سی بی کا تہہ دل سے شکریہ ادا کرتا ہوں۔

دوسری جانب نئے تعمیر کردہ قذافی اسٹیڈیم کا آج باقاعدہ افتتاح ہو گا، وزیراعظم پاکستان محمد شہباز شریف قذافی اسٹیڈیم کا افتتاح کریں گے اور عوام کا داخلہ مفت ہو گا۔

قذافی اسٹیڈیم کی رنگا رنگ افتتاحی تقریب میں معروف سنگر آواز کا جادو جگائیں گے، علی ظفر، عارف لوہار اور آئمہ بیگ افتتاحی تقریب میں پرفارم کریں گے جبکہ آتش بازی، لائٹس شو اور ڈھول کا شاندار مظاہرہ ہو گا۔