پاکستان ویمنز کرکٹ ٹیم کی سابق کپتان اور سینئر آل راؤنڈر ندا ڈار نے کرکٹ سے عارضی طور پر وقفہ لینے کا اعلان کر دیا ہے جس کی وجہ انہوں نے ذہنی صحت کے مسائل کو قرار دیا ہے۔

ندا ڈار نے یہ اعلان اپنے سوشل میڈیا پلیٹ فارمز پر کیا جس میں انہوں نے کہا کہ گزشتہ چند ماہ کے دوران ذاتی اور پیشہ ورانہ زندگی میں بہت سے چیلنجز کا سامنا رہا جس نے میری ذہنی صحت پر گہرا اثر ڈالا۔

ندا ڈار نے لکھا کہ اسی لیے میں نے فیصلہ کیا ہے کہ کچھ وقت خود پر توجہ دینے کے لیے کرکٹ سے وقفہ لوں۔ انہوں نے مداحوں اور میڈیا سے اپنی پرائیویسی کا احترام کرنے کی اپیل بھی کی ہے۔

ذرائع کے مطابق، ندا ڈار کو آئی سی سی ویمنز ورلڈ کپ کوالیفائر کے لیے اعلان کردہ تربیتی کیمپ میں طلب کیا گیا تھا تاہم وہ فیصل آباد میں ہونے والے کیمپ میں شریک نہ ہوسکیں۔ فٹنس ٹیسٹ میں ناکامی کے باعث انہیں اسکواڈ میں شامل نہیں کیا گیا۔

یہ بھی پڑھیں: ندا ڈار نے ٹی ٹوئنٹی انٹرنیشنل میں نیا ریکارڈ قائم کردیا

بعد ازاں انہیں نیشنل ٹی ٹوئنٹی کپ میں شرکت کی دعوت بھی دی گئی تھی جو کہ خواتین کا ڈومیسٹک ٹورنامنٹ ہے لیکن انہوں نے اس میں حصہ لینے سے انکار کرتے ہوئے باضابطہ طور پر وقفے کا اعلان کیا۔

واضح رہے کہ ندا ڈار پاکستان ویمنز کرکٹ کی سب سے تجربہ کار آل راؤنڈرز میں شمار ہوتی ہیں۔ وہ پاکستان کی جانب سے سب سے زیادہ وکٹیں لینے والی ٹی ٹوئنٹی بولر بھی ہیں اور کئی بار قومی ٹیم کی قیادت بھی کرچکی ہیں۔