نئی دہلی: بھارتی کرکٹ ٹیم کے سابق کپتان اور اسٹار بیٹر ویرات کوہلی نے ٹیسٹ کرکٹ سے ریٹائرمنٹ کا اعلان کردیا۔

ویرات کوہلی نے اتوار کے روز سوشل میڈیا پلیٹ فارم انسٹاگرام پر ایک جذباتی پیغام میں اپنے فیصلے سے آگاہ کرتے ہوئے کہا کہ وہ ٹیسٹ کرکٹ کے 14 سالہ سفر کو الوداع کہہ رہے ہیں۔

ان کا کہنا تھا کہ نیلی انڈین ٹوپی پہنے آج بھی وہ لمحہ یاد ہے جس سے ایک ایسا سفر شروع ہوا جس نے انہیں سنوارا، آزمایا اور زندگی کے انمول سبق سکھائے۔

انہوں نے مزید کہا ’’سفید لباس میں کھیلنے کا ایک الگ ہی وقار ہے۔ طویل دن، خاموش محنت اور وہ لمحات جو شاید دنیا نہ دیکھے مگر کھلاڑی کے دل میں ہمیشہ زندہ رہتے ہیں‘‘۔

ویرات کوہلی نے تسلیم کیا کہ ٹیسٹ کرکٹ کو خیرباد کہنا آسان نہیں تاہم ان کے مطابق یہ ریٹائرمنٹ کا درست وقت ہے۔ انہوں نے کھیل، ساتھی کھلاڑیوں اور مداحوں کا شکریہ ادا کرتے ہوئے کہا کہ وہ ہمیشہ اس سفر کو مسکراہٹ کے ساتھ یاد رکھیں گے۔

ٹیسٹ کیریئر پر ایک نظر:

ویرات کوہلی نے 123 ٹیسٹ میچز میں 9,230 رنز بنائے جن میں 30 سنچریاں اور 31 نصف سنچریاں شامل ہیں۔ ان کی بیٹنگ اوسط 46.9 رہی۔

وہ بھارت کی ٹیسٹ کرکٹ کی تاریخ میں سب سے زیادہ رنز بنانے والے چوتھے کھلاڑی ہیں، ان سے آگے صرف سچن ٹنڈولکر، راہول ڈریوڈ اور سنیل گواسکر ہیں۔

کپتانی کے دور میں بھی کوہلی نے ٹیسٹ کرکٹ کو نئی شناخت دی۔ ان کی قیادت میں بھارت نے آسٹریلیا میں تاریخی سیریز جیتی اور ٹیم طویل عرصے تک آئی سی سی ٹیسٹ رینکنگ میں سرفہرست رہی۔

بی سی سی آئی کو توقع تھی کہ کوہلی رواں سال انگلینڈ کے خلاف ہوم سیریز میں ایکشن میں دکھائی دیں گے تاہم انہوں نے اس سے قبل ہی ریٹائرمنٹ کا فیصلہ کرلیا۔

واضح رہے کہ ویرات کوہلی اس سے قبل ٹی ٹوئنٹی فارمیٹ سے بھی عالمی کپ جیتنے کے بعد ریٹائر ہوچکے ہیں۔