پاکستان کی ہاکی ٹیم کو سفارتی سطح پر بھارت میں ہونے والے آئندہ ہاکی ایشیا کپ میں شرکت کے لیے باضابطہ کلیئرنس دے دی گئی ہے۔

ہاکی ایشیا کپ کا 12واں ایڈیشن 27 اگست سے 7 ستمبر 2025 تک بھارتی ریاست بہار کے شہر راجگیر میں منعقد ہوگا۔

پاکستان کی شرکت کا معاملہ دونوں ممالک کے درمیان کشیدہ تعلقات کے باعث غیر یقینی تھا جو رواں برس مزید خراب ہوئے۔

تاہم بھارت کی وزارت کھیل کے ترجمان نے غیر ملکی میڈیا سے بات کرتے ہوئے تصدیق کی ہے کہ پاکستان کی شرکت پر کوئی اعتراض نہیں ہے۔

ترجمان نے بھارتی میڈیا سے گفتگو میں کہا ’’ہم کسی بھی ٹیم کی بھارت میں کثیرالملکی مقابلوں میں شرکت کے خلاف نہیں لیکن دو طرفہ مقابلہ ایک الگ معاملہ ہے‘‘۔

اس فیصلے کے بعد پاکستان ٹیم کی راجگیر روانگی کی راہ ہموار ہوگئی ہے۔ البتہ یہ ابھی واضح نہیں کہ پاکستان ہاکی فیڈریشن ٹیم کو بھارت بھیجنے کی اجازت دے گی یا نہیں۔

پی ایچ ایف اس ایونٹ میں شرکت کے لیے پُرعزم ہے لیکن امکان ہے کہ وہ کرکٹ کی طرز پر کوئی ہائبرڈ ماڈل کی تجویز دے جس طرح پی سی بی اور بی سی سی آئی کے درمیان طے ہوا تھا۔

جو بھی فیصلہ ہو بھارت سے کلیئرنس ملنا پاکستان کے لیے ایک بڑی پیش رفت ہے کیونکہ ہاکی ایشیاکپ ایک کلیدی ٹورنامنٹ ہے جو 2026 میں ہونے والے مینز ایف آئی ایچ ہاکی ورلڈ کپ میں رسائی کا راستہ فراہم کرتا ہے۔

واضح رہے کہ اب جب کہ انتظامی رکاوٹیں کافی حد تک دور ہوچکی ہیں تو توجہ اس بات پر مرکوز ہوگی کہ پاکستان کے میچز کہاں کھیلے جائیں گے۔