جوہر ہاکی کپ، سنسنی خیز مقابلے کے بعد پاکستان اور بھارت کا میچ تین تین گول سے برابر

ویب ڈیسک

14th Oct, 2025. 10:17 pm
شيئر
- Font size
  - Small
  - Medium
  - Large
- Dark Mode
- Save
- Print

آرٹیکلز

Now Reading:

جوہر ہاکی کپ، سنسنی خیز مقابلے کے بعد پاکستان اور بھارت کا میچ تین تین گول سے برابر

سلطان آف جوہر جونیئر ہاکی کپ کے اہم ترین مقابلے میں روایتی حریف پاکستان اور بھارت کی ٹیموں کے درمیان مقابلہ سنسنی خیز لمحات سے بھرپور رہا، جو آخرکار 3-3 گول سے برابر ہو گیا۔

میچ کا آغاز ہی تیز رفتاری اور جارحانہ حکمت عملی سے ہوا۔ پاکستانی کپتان حنان شاہد نے صرف پانچویں منٹ میں شاندار فیلڈ گول کے ذریعے اپنی ٹیم کو ابتدائی برتری دلائی۔

تاہم بھارت نے دوسرے کوارٹر میں انمول اکا کے گول کی بدولت اس برتری کو ختم کر دیا۔

تیسرے کوارٹر کے 39ویں منٹ میں سفیان خان نے ایک بار پھر پاکستان کو سبقت دلا دی، لیکن چوتھے اور فیصلہ کن کوارٹر میں بھارتی ٹیم نے زوردار واپسی کی۔

پہلے سوربھ کشواہا نے 47ویں منٹ میں گول کر کے مقابلہ برابر کیا، پھر منمیت سنگھ نے 53ویں منٹ میں گیند کو جال میں پہنچا کر بھارت کو برتری دلائی۔

تاہم پاکستان نے ہمت نہ ہاری اور صرف دو منٹ بعد 55 ویں منٹ میں سفیان خان نے ایک اور شاندار گول کرتے ہوئے بھارت کی برتری کو مٹی میں ملا دیا اور میچ 3-3 سے برابر کر دیا۔