لاہور: پاکستان نے شاندار کارکردگی کا مظاہرہ کرتے ہوئے ٹرائی نیشن سیریز اپنے نام کرلی، جبکہ محمد نواز کو مین آف دی میچ اور مین آف دی سیریز قرار دیا گیا ہے۔
آل راؤنڈر محمد نواز نے فائنل میں 3 وکٹیں حاصل کرکے ٹیم کی کامیابی میں اہم کردار ادا کیا۔
شاندار کارکردگی پر انہیں میچ کا بہترین کھلاڑی اور سیریز میں مجموعی کارکردگی کے اعتراف میں سیریز کا بہترین کھلاڑی بھی قرار دیا گیا۔
تقریبِ تقسیمِ انعامات میں چیئرمین پی سی بی محسن نقوی نے چیمپئن پاکستانی ٹیم کو ٹرافی پیش کی۔
قومی ٹیم کے کپتان سلمان علی آغا نے اس موقع پر کہا کہ ہم نے گزشتہ دو ماہ میں بہترین کرکٹ کھیلی ہے۔ کوشش کریں گے کہ اسی شاندار کارکردگی کو برقرار رکھیں۔
مزید پڑھیں: ٹرائی نیشن سیریز، پاکستان نے سری لنکا کو 7 وکٹ سے ہرادیا
انہوں نے کہا کہ ورلڈ کپ سے قبل مسلسل کامیابیوں سے ٹیم کے اعتماد میں اضافہ ہوا ہے، جبکہ ورلڈ کپ کے لیے 15 بہترین کھلاڑیوں کو فائنل کرنے کے قریب ہیں۔
سری لنکن کپتان نے بھی پاکستانی ٹیم کی شاندار کارکردگی کو سراہتے ہوئے کہا کہ دونوں ٹیموں نے بہترین کرکٹ پیش کی۔
چیئرمین پی سی بی محسن نقوی نے قومی ٹیم کو سیریز جیتنے اور سری لنکن ٹیم کو دل جیتنے پر مبارکباد پیش کی ہے۔
محسن نقوی نے کہا کہ قومی ٹیم نے بہترین کارکردگی اور شاندار ٹیم ورک کے ساتھ فائنل میں سری لنکا کو شکست دی۔
ان کے مطابق پوری سیریز میں ٹیم پاکستان نے شاندار کھیل کا مظاہرہ کیا جو قابلِ تعریف ہے۔
چیئرمین پی سی بی نے کپتان سلمان آغا، کوچ مائیک ہیسن اور تمام کھلاڑیوں کو مبارکباد پیش کرتے ہوئے کہا کہ عمدہ حکمتِ عملی، بےمثالی اتحاد اور مہارت نے ٹیم کی کارکردگی کو شاندار بنایا۔
