پاکستان  کرکٹ ٹیم کے فیوچر ٹور پروگرام میں تبدیلی کرتے ہوئے 10 ٹی ٹوئنٹی میچز کا اضافہ کردیا گیا۔

تفصیلات کے مطابق پاکستان کرکٹ بورڈ (پی سی بی) نے ٹیم کا ترمیم شدہ فیوچر ٹور پروگرام جاری کردیا۔

پاکستان ٹیم اگلے سال نیوزی لینڈ سے 10 ٹی ٹوئنٹی میچز کھیلے گی جو ٹی ٹوئنٹی ورلڈ کپ 2024 سے قبل پاکستان کرکٹ ٹیم کو بھرپور تیاری کا موقع فراہم  کریں گے۔

دونوں بورڈز باہمی مشاورت سے 10 میچز کے انعقاد پر راضی ہوئے۔ 5 میچز 12 سے 21 جنوری  تک نیوزی لینڈ میں اور 5 میچز اپریل میں پاکستان میں  کھیلے جائیں گے۔

پاکستان کرکٹ ٹیم آسٹریلیا میں سیریز کھیلنے کے بعد براہ راست نیوزی لینڈ پہنچے گی۔

پہلا میچ 12 جون کو آکلینڈ، دوسرا میچ 14 جون کو ہیملٹن ، تیسرا میچ 17 جون کو ڈونیڈن جبکہ  چوتھا  اور پانچواں میچ 19 اور 21 جون کو کرائسٹ چرچ میں  کھیلا جائے گا۔

پی سی بی  کا کہنا ہے کہ اپریل میں پاکستان میں ہونے والے 5 میچز کا شیڈول بعد میں جاری کیا جائے گا۔

📢 T20I series with New Zealand confirmed 📢

Presenting the revised Men's FTP 2023-24 🏏

Read more ➡️ https://t.co/JvQccyrQvo pic.twitter.com/XQizwCVEeL

Advertisement

— Pakistan Cricket (@TheRealPCB) July 17, 2023

نیوزی لینڈ سے اضافی میچز کے انعقاد کے بعد پاکستان کرکٹ ٹیم اب ویسٹ انڈیز اور امریکہ میں ہونے والے ٹی ٹوئنٹی ورلڈ کپ سے قبل 19  ٹی ٹوئنٹی میچز کھیلے گی جس میں انگلینڈ سے 4، آئرلینڈ سے 2  اور نیدرلینڈز سے 3 میچز شامل ہیں۔

فیوچر ٹور پروگرام  میں ان اضافی ٹی ٹوئنٹی میچز کے انعقاد کو یقینی بنانے کیلئے معمولی تبدیلی کی گئی ہے۔

پاکستان کی فروری 2024 میں ویسٹ انڈیز کے ساتھ دو ٹیسٹ  میچز کی  سیریز اب جنوری 2025 میں کھیلی جائے گی جبکہ 2025 میں پاکستان کے دورہ نیوزی لینڈ کا شیڈول بھی تبدیل کیا گیا ہے۔

جنوری 2025 کے پاک نیوزی لینڈ میچز اب اپریل 2025 میں ہوں گے ۔ پاکستان نے 2025 میں نیوزی لینڈ کے خلاف 3 ون ڈے اور 5 ٹی ٹوئنٹی  میچز کھیلنے ہیں۔