چیئرمین پی سی بی محسن نقوی نے قذافی اسٹیڈیم اپ گریڈیشن پروجیکٹ کو مقررہ مدت میں مکمل کرنے کےحوالےسے ایف ڈبلیو او اور نیسپاک کو ہدایات  جاری کردیں۔

تفصیلات کے مطابق قذافی اسٹیڈیم اپ گریڈیشن پروجیکٹ کے معائنے کے لیے چیئرمین پی سی بی محسن نقوی  نے قذافی اسٹیڈیم کا تفصیلی دورہ کیا۔

چیئرمین پی سی بی نے بیسمنٹ میں جاری واٹر ٹینک کی تعمیر اور اسٹیل فکسنگ کے کاموں کا معائنہ کیا۔

محسن نقوی نے پروجیکٹ کو مقررہ مدت میں مکمل کرنے کےحوالےسے ایف ڈبلیو او اور نیسپاک کو ہدایات  جاری کرتے ہوئے کہا کہ اسٹیل فکسنگ کا کام جلد مکمل کرکے دیگر تعمیراتی کاموں کو  بھی ٹائم لائن کےاندرمکمل کیا جائے۔

چیئرمین پی سی بی کی زیر صدارت ایف ڈبلیو او کے کیمپ آفس میں اجلاس بھی منعقد ہوا جس میں انہوں نے نیسپاک کو  ڈرائنگز جلد مکمل کرکے ایف ڈبلیو او کو دینے کی ہدایت کی۔

انہوں نے کہا کہ اسٹیڈیم کے اپ گریڈیشن پروجیکٹ  کو چیمپئنز ٹرافی سے قبل مکمل کرنا ہے۔

ایف ڈبلیو او کے پروجیکٹ ڈائریکٹر نے قذافی اسٹیڈیم اپ گریڈیشن پروجیکٹ پر پیش رفت کے بارے  میں بریفنگ دی۔

پی سی بی کے ڈائریکٹر انفراسٹرکچر، سینئر جنرل مینجر انفراسٹرکچر ، نیسپاک اور ایف ڈبلیو او کے متعلقہ حکام بھی اس موقع پر موجود تھے۔